Saýda jáne integratsiia ministri Baqyt Sultanov áleýmettik mańyzy bar azyq-túlik taýarlary baǵasynyń ne sebepti ósip jatqanyn túsindirdi, dep habarlaidy Sputnik Qazaqstan.
"Biz barlyq jerde piiaz, sábiz, kartop, kúrish, un baǵasynyń eleýli óskenin baiqap otyrmyz. Baǵanyń ósýine – óndiristiń rettelmeýi, tiimsiz deldaldyń tym kóptigi, azyq-túlikti saqtaý shartynyń oryndalmaýy jáne tutynýshyǵa deiin kepildendirilgen jetkizý arnalarynyń joqtyǵy sebep", - dedi Sultanov úkimet otyrysynda.
Sondai-aq, ministr ishki naryqtaǵy baǵaǵa EAEO-ǵa múshe elderdegi jaǵdai da áserin tigizetinin atap ótti.
"Resei men Qazaqstan baǵalary arasynda aiqyn oń korreliatsiia kórinedi. Reseide baǵanyń ósýine bailanysty bizdiń baǵalarymyz da, eksport kólemi de ósýde", - dedi vedomstvo basshysy.
Aitýynsha, dizel otyny baǵasynyń ósýi de azyq-túlik ónimderiniń qymbattaýyna sebep bolǵan.
Ulttyq ekonomika ministrliginiń aqparatynsha, jyldyq infliatsiia 5,4% deńgeiinde qalyptasty. Infliatsiianyń ósýine azyq-túlik taýarlary eń kóp áser etken.
Áleýmettik mańyzy bar azyq-túlik taýarlary Nur-Sultan (15,1%), Jezqazǵan (11,8%) jáne Taldyqorǵan (10,4%) qalalarynda kóp qymbattaǵan.
Máselen, Nur-Sultan qalasynda sábiz (2,4 ese), piiaz (85,5%), kartop (82,4%), kúrish (21,6%) jáne un baǵasy (20,8%) aitarlyqtai ósti.
Respýblika boiynsha áleýmettik mańyzy bar azyq-túlik taýarlarynyń arasynda kelesi ónimderge baǵalardyń eń kóp ósýi baiqalady:
- piiaz - 79,0%;
- sábiz - 59,3%;
- kartop – 32,9%;
- kúrish - 23,8%;
- birinshi surypty un - 15,3%.
