QR premer-ministri Álihan Smaiylov Úkimettiń Tsifrlyq keńsesinde áleýmettik mańyzy bar azyq-túlik taýarlarynyń baǵasyn ustap turý, sondai-aq "SQ-Farmatsiia" JShS bazasynda meditsinalyq tehnikany ortalyqtandyrylǵan satyp alýǵa kóshý máseleleri jóninde keńes ótkizdi, - dep habarlaidy "Ult aqparat" primeminister.kz saityna silteme jasap.
Baiandama jasaǵan QR Saýda jáne integratsiia ministrliginiń Saýda komitetiniń tóraǵasy Erjan Qazanbaev ótken aptada áleýmettik mańyzy bar azyq-túlik taýarlary baǵasynyń ósimi 0,6 paiyz bolǵanyn habarlady. Atap aitqanda, piiaz 2,9 paiyz, qyryqqabat 2,8 paiyz, qus eti 2,5 paiyz, sábiz 2,3 paiyz, qant 1,5 paiyzǵa qymbattady. Óńirler arasynda baǵanyń eń joǵary ósýi Nur-Sultan (0,9 paiyz) jáne Almaty (0,8 paiyz) qalalarynda tirkeldi.
Onyń aitýynsha, elimizde saýda ústemesin baqylaý jumystary aiasynda úi mańyndaǵy 32 308 dúken tekserildi (qamtý – 77 paiyz), sonyń nátijesinde 358 zańbuzýshylyq anyqtaldy. Barlyq derekter boiynsha tiisti sharalar qabyldanǵany habarlandy.
Aýyl sharýashylyǵy ministri Erbol Qarashókeevtiń aitýynsha, búgingi tańda Qazaqstanda azyq-túliktiń (jańa ónimdi eseptemegende 669 841 tonna), onyń ishinde siyr eti, kartop, un, jumyrtqa, sút jáne basqalarynyń edáýir qory qalyptastyrylǵan.
Sondai-aq QR premer-ministri ÁMAT baǵasynyń eń joǵary ósimi tirkelgen Nur-Sultan qalasy ákiminiń orynbasary Erlan Bekmurzaevtyń jáne Almaty qalasy ákiminiń orynbasary Álisher Ábdiqadyrovtyń, sondai-aq respýblika boiynsha qyryqqabattyń eń joǵary baǵasy (kilogramyna 340 teńge) tirkelgen Pavlodar oblysynyń ákimi Ábilqaiyr Sqaqovtyń esepterin tyńdady.
Keńesti qorytyndylai kele, Álihan Smaiylov baǵany ustap turý máseleleri birinshi kezekte mańyzdy ekenin atap ótti.
"Men birneshe ret "ainalym shemasyn" qarjylandyrýdy arttyrýdy tapsyrdym, alaida búginde jumys tiisti deńgeide oryndalmady. Osy aidyń aiaǵyna deiin qarjylandyrýdy 100 milliard teńgege deiin ulǵaitý qajet. Bul kórsetkishti maqsatty deńgeige jetkizbeitin óńirlerde ákimderdiń atalǵan salaǵa jetekshilik etetin orynbasarlaryna tiisti shara qoldaný týraly usynystar qaralatyn bolady", - dedi Úkimet basshysy.
Álihan Smaiylov aldaǵy agrarlyq maýsym qarsańynda óńirlerdiń basty mindeti kúzgi aýyl sharýashylyǵy ónimderin jetkizýge forvardtyq sharttar jasasý bolýy tiis ekenin atap ótti.
Aýyl sharýashylyǵy ministrligine ákimdiktermen birge baǵany ustap turý maqsatynda aýyl sharýashylyǵy ónimderin jedel túrde tikelei jetkizý úshin óndiris pen tutyný teńgerimin turaqty negizde ózektendirip otyrý tapsyryldy.
Kún tártibindegi ekinshi másele boiynsha sóz sóilegen densaýlyq saqtaý ministri Ajar Ǵiniiat "SQ-Farmatsiia" JShS meditsinalyq tehnikasyn ortalyqtandyrylǵan satyp alýǵa kóshý Memleket basshysynyń tapsyrmasyna sáikes júrgizilip jatqanyn eske saldy. Biyl jobany pilottyq rejimde iske asyrý josparlanyp otyr, al 2023 jyldan bastap jabdyqtardy jergiliktendirý nemese kelisimsharttyq negizde óndirý boiynsha uzaq merzimdi sharttar jasalady.
Talqylaý qorytyndysy boiynsha Úkimet basshysy beiindi Ministrlikke ákimdikter kótergen máselelerdi eskere otyryp, ortalyqtandyrylǵan satyp alý tetikterin pysyqtaýdy jáne Úkimetke tiisti usynystar engizýdi tapsyrdy.
