Resei áskeriniń qorshaýynda qalǵan Mariýpol qalasyndaǵy "Azovstal" metallýrgiia zaýytynan 30 sáýirde 20 áiel men bala evakýatsiialandy. Bul jóninde "Azov" polki komandiriniń orynbasary Sviatoslav Palamar videomálimdemesinde habarlady. Onyń sózine qaraǵanda, saǵat 11-den bastap "Azovstal" aýdany "tynyshtyq rejiminde" bolǵan. Bul kombinat aýmaǵynan adamdardyń biraz bóligin shyǵarýǵa múmkindik bergen, dep habarlaidy Azattyq.
Palamar evakýatsiialanǵan azamattar Ýkraina baqylaýyndaǵy Zaporojege ketken shyǵar dep úmittenedi.
Senbi kúni reseilik RIA Novosti jáne TASS agenttikteri "Azovstaldan" 25 beibit turǵyn (altaýy bala) shyqqanyn habarlaǵan. Telegram arnalardyń jazýynsha, Mariýpol túbinde BUU men Qyzyl krest ókilderiniń qatysýymen zaýyttan azamattardy evakýatsiialaý máselesi boiynsha kelissóz bastalǵan. Kiev aqparatty rastaǵan.
Osy apta BUU bas hatshysy Antoniý Gýterrish Máskeýde Resei prezidenti Vladimir Pýtinmen kezdesken. Kelissózden keiin Resei taraby Pýtin BUU men Qyzyl krest ókilderiniń qatysýymen Mariýpolden beibit turǵyndardy evakýatsiialaýǵa keliskenin habarlaǵan.
Qazir Mariýpol Resei áskeriniń baqylaýynda. "Azovstal" metallýrgiia kombinatynyń aýmaǵy ǵana ýkrainalyq "Azov" batalonynyń baqylaýynda. Ol jaqta áskerilerden bólek, birneshe júz jaraly adam, beibit turǵyndar bar. Kombinat aýmaǵynda qansha adamnyń qalǵany belgisiz.
Ýkraina zaýyttaǵylarǵa Resei áskeri Kiev baqylaýyndaǵy aýmaqqa evakýatsiialanýyna múmkindik berýi tiis deidi. Al Resei biligi ýkrain áskeri berilip, al beibit turǵyndar Resei kúshteri nemese separatister baqylaýyndaǵy aýmaqqa barýy kerek degen.
Mariýpol biliginiń málimetinshe, Resei áskeri qalaǵa basyp kirgeli beri 20 myńnan astam qala turǵyny qaza bolǵan.
