Foto: russian.xinhuanet.com
Týrizm jáne sport ministrligi aldaǵy jazǵy Aziia oiyndarynda júlde alǵan qazaqstandyq sportshylar men olardyń jattyqtyrýshylaryna beriletin aqshalai yntalandyrý mólsherin jariialady, dep habarlaidy "Ult aqparat" vedomstvonyń baspasóz qyzmetine silteme jasap.
"Aziia oiyndarynyń chempiony atanǵan sportshyǵa 10 000 AQSh dollary kóleminde aqshalai syiaqy beriledi. Al, altyn medal iegerin jarysqa daiyndaǵan jattyqtyrýshyǵa 5000 AQSh dollary qarastyrylyp otyr.
Qurlyq birinshiliginiń kúmis júldegeri 5000 AQSh dollary, al jattyqtyrýshysy 3000 AQSh dollary kóleminde syiaqy alady. Sondai-aq qola medal enshilegen qurama sportshysyna 3000 AQSh dollary, al onyń jattyqtyrýshysyna 2000 AQSh dollary kóleminde aqshalai yntalandyrý belgilengen" - delingen habarlamada.
Aziia oiyndary 23 qyrkúiek pen 8 qazan aralyǵynda Qytaidyń Hanchjoý qalasynda ótedi. Óz tarihynda 29-shy márte jalaýyn kóteretin Aziia oiyndarynda 40-tan astam sport túrinen júldeler sarapqa salynady. Qurlyq birinshiligine 45 memleket qatysady dep josparlanyp otyr.
«Aziia oiyndaryna qatysatyn ulttyq qurama jasaqtalyp, elimizdiń ár óńirinde oqý-jattyǵý jiyndaryn ótkizip jatyr. Sportshylarymyz jaqyn kúnderi Qytaiǵa attanady», - deidi QR Týrizm jáne sport ministrliginiń resmi ókili Móldir Ábdýalieva.
