video kadry
Aziia oiyndarynda óner kórsetip júrgen qazaqstandyq sportshynyń shaǵymynan keiin arnaiy komissiia qurylatyn boldy, dep habarlaidy Sputnik Qazaqstan.
"Aziia oiyndarynan keiin arnaiy komissiia qurylady. Ol sportshylardyń túrli jarystarda óner kórsetýi úshin sporttyq forma daiyndaý máselelerin zertteidi", - dep málimdedi Sportty damytý direktsiiasy.
Qoldanystaǵy zańnamaǵa sáikes, sport kiimi reestrge kiretin jáne indýstriialyq sertifikaty men ST-KZ sertifikaty bar otandyq taýar óndirýshilerden satyp alynýǵa tiis.
"Sporttyq forma osy sertifikaty bar óndirýshilerden satyp alyndy. Aita keteri, indýstriialyq sertifikaty men ST-KZ sertifikaty bar otandyq óndirýshiler sany az. "KazSpo-N kompaniiasy "Zibroo" JShS, JK 79-shy KVARTAL jáne "TORI KOMPANI" JShS-men shart jasaldy. Jetkizý tolyq kólemde júzege asyryldy", - dep atap ótti direktsiiadaǵylar.
"Mysaly, Zibroo kompaniiasy Olimpiada jáne Aziia oiyndaryna qatysatyn sportshylar úshin sporttyq kiim tigip, ózin adal jetkizýshi retinde kórsetti. Sporttyq formanyń dizainy álemdik arenada birneshe ret eń jaqsylardyń biri dep tanyldy. Sondai-aq, jetkizýshi kompaniialar qajet bolǵan jaǵdaida formany aýystyryp berýge daiyn", dep tolyqtyrdy Sportty damytý direktsiiasy.
Direktsiia buǵan deiin formanyń dizainy men sapasy federatsiia ókilderimen kelisilgenin jáne sportshylar tarapynan shaǵym túspegenin atap ótti.
Esterińizge sala keteiik, Aziia oiyndarynda óner kórsetip júrgen qazaqstandyq sportshy ulttyq qurama kiiminiń sapasyna shaǵymdanyp, video jariialaǵan bolatyn. Onyń aitýynsha, eki ret kiilgen aiaq kiimniń ókshesi túsip qalǵan, al jeide jyrtylǵan.
