Erteń elordada bastalatyn Aziia qalamgerleriniń I forýmyna Nobel syilyǵynyń 3 nominanty men ózge de tanymal tulǵalar qatyspaq, dep habarlaidy QazAqparat.
Qazaqstan Jazýshylar odaǵynyń tóraǵasy Ulyqbek Esdáýlettiń aitýynsha, bul forýmǵa áýelde Mo Ian, Orhan Pamýk, Harýki Mýrakami, Kendzabýro Oe siiaqty Nobel syilyǵynyń laýreattary men nominanttary shaqyrylǵan eken. Alaida Nur-Sultanǵa kelýge tek Nobel syilyǵynyń 3 nominanty ǵana múmkindik taýypty.
«Nobel syilyǵynyń laýraeaty Kendzabýro Oeniń jasy 85-ke kelipti. Uzaq joldy kótere almaitynyn aitty. Al Orhan Pamýk AQSh-qa ketip bara jatqandyqtan, taǵy birde kelýge ýáde berdi. Mo Ian myrzany Qytai jazýshylar odaǵynyń tóraiymy ákelýge ýáde bergen. Sóitse, ol kisi Qytai aýmaǵynan jylyna eki-aq ret shyǵa alady eken. Eki múmkindigin de paidalanyp qoiǵandyqtan, ol da bolashaqta kelýge ýáde berdi», - deidi forým iesi.
Áitse de, forýmǵa kele jatqan 70-ten astam aqyn-jazýshynyń bári de óz elinde eń tanymal tulǵalar deýge bolady. Solardyń arasynda Qytai Memlekettik syilyǵynyń iegeri, pekindik jazýshy, qandasymyz Ákbar Májit te bar. Jalpy bul forýmǵa Qytai óziniń 3 jazýshysyn jiberip otyr. Irandyq Saiid Hodi Kiesari de parsy áleminde kózi tiri jazýshylardyń eń tanymaly sanalady. Reseiden Anatolii Kim bastaǵan 5 ádebietshi, Úndistannan «Dýrbapýtra» romanynyń avtory Amar Mitra, Malaiziiadan ǵalym-aqyn Mýhamad Salleh, Vetnamnan «Teksiz adam tarihy» kitabynyń avtory Hýan Dýk siiaqty tanymal ádebiet ókilderi qatysady dep josparlanýda.
Sondai-aq, Kýveit, Iordaniia, Nepal, Brýnei, Saýd Aarabiiasy, Indoneziia, Kambodja, Tailand, Japoniia, Irak, Ózbekstan, Shri-Lanka siiaqty 38 eldiń aqyn-jazýshylary úsh kún boiy ádebiet álemine qatysty ózekti máselelerdi talqylamaq.
Solardyń ishinde Nobel syilyǵynyń nominananttary koreialyq Ko Yn, mońǵoliialyq Mend Oeo, katarlyq Moza Ál Malki bar.
Eske salsaq, 4-6 qyrkúiek kúnderi elordada Aziia elderi qalamgerleriniń tuńǵysh forýmy ótedi.
