16 mamyrda barsha musylman jamaǵaty úshin qasietti Ramazan aiy bastalady. Osy oraida Sputnik Qazaqstan tilshisi "Áziret Sultan" meshitiniń naib imamy Qanat Qydyrminnen Ramazan aiyna qalai daiyndalý kerektigin surady.
"Qazir biz Ramazannyń aldyndaǵy Shaǵban aiyna kirip jatyrmyz. Islam ǵalymdary Ramazanǵa daiyndyqta birneshe máseleni qarastyrady. Eń birinshi, ol musylmannyń nietin jańartyp alý. Iaǵni bir iske kirispei turyp, aldymen niet etý bul qaiyrly is bolyp sanalady. Paiǵambarymyz (s.ǵ.s.) aitady: "árbir nárse nietpen ǵana durys bolady jáne adam niet etken nársesine qol jetkizedi". Sondyqtan da qasietti Ramazan aiynyń aldynda eń áýeli nietti durystap alý kerek. Ramazannyń negizgi maqsaty týraly Alla Taǵala Quranda bylai deidi: "ei, iman keltirgender, aqiqatynda senderge oraza paryz boldy. Bálkim, sender Alladan qorqatyn bolarsyńdar" deidi. Ramazannan shyǵýdaǵy negizgi maqsat adam Alladan qorqyp, imandylyqpen shyǵýy kerek. Ol tek sýsynnan, tamaqtan tyiylý emes. Paiǵambarymyz (s.ǵ.s.) aitady: "kimde-kim jaman sóz sóileýin jáne jaman isin toqtatpasa, Alla Taǵalaǵa onyń tamaqtan, sýsynnan tyiylǵany qajet emes". Endeshe Ramazannyń ishki syry – tek tamaqtan, sýsynnan emes, jaman sóz ben isten, jaman oidan tyiylý. Adam izgilikti niet etip, jaqsy jaǵyna ózgerýge tyrysý kerek. Iaǵni, eń birinshi Ramazanǵa daiyndyq niet arqyly bolady", — dedi imam.
Ramazan aiyna daiyndyq retinde jasalatyn ekinshi nárse – duǵa tileý.
"Paiǵambarymyz (s.ǵ.s.) "Alla Taǵala Erejep aiyn, Shaǵban aiyn berekeli etshi jáne bizdi Ramazanǵa jetkizshi" dep duǵa qylatyn bolǵan eken. Sondyqtan árbir musylman "Alla Taǵala, Ramazanǵa jetkize gór" dep duǵa etýi kerek. Úshinshisi, egerde adam bireýge qaryz nemese amanaty bolatyn bolma, Ramazan aiyna deiin qutylyp, qasietti aiǵa taza, táýbemen kirgeni jaqsy. Ramazan – Alla men quldyń arasyndaǵy bailanys, al bireýdiń zaty adam men adamnyń arasyndaǵy haqysy. Sondyqtan adamnyń haqysy jelingen bolsa, Allanyń aldynda ol adamnyń orny biiktemeidi. Ol adam qansha jerden namazda jylap tursyn, qajylyq qylsyn, oraza ustasyn, biraq ol basqa bireýge qiianat jasap, alǵan zatyn qaitarmai júrgen bolsa nemese aldap ketken bolsa, Alla Taǵala onyń namazda jylap turǵanyn qajet etpeidi. Óitkeni bul jerde adamnyń haqysy jelinip tur. Sondyqtan Ramazanǵa deiin bireýden alǵan dúnieni qaitaryp, bergen ýádeni oryndap, táýbe jasap, taza kirgen jaqsy", — dedi Qydyrmin.
Imamnyń aitýynsha, munyń ishine ótken Oraza aiynan qalǵan qaryzdy ustaý da kiredi. Ramazan aiyna ótken jyldyń qaryzymen kirýge bolmaidy. Qaryz bolsa, osy Shaǵban aiynda ótep tastaǵan jaqsy eken.
"Tórtinshi másele, Ramazan aiynda musylman adamdy ǵibadattan nemese qulshylyqtan mazalaityn jumystar bolatyn bolsa, solardy Ramazanǵa deiin sheship tastaý. Bul degenimiz ne? Keibir kezde adamdar Oraza aiynyń aldynda bir isti bastap qoiyp, ony aiaqtap úlgermei, Ramazan aiynda sol istiń mashaqatymen júrip, aýyzsharǵa ǵana kóńil bóledi. Sóitip júrip Ramazan aiyndaǵy basqa ǵibadattardan jurdai bolyp qalýy múmkin. Nege? Ramazanǵa josparsyz kirgendikten. Sondyqtan kez kelgen musylman Ramazan aldyndaǵy daiyndyq retinde osy aiǵa úlken saparlardy nemese toi-dýmandardy josparlamaǵany abzal. Ondai isterdi Ramazanǵa deiin nemese keiin jasaý ádemirekteý bolady. Besinshisi, ózi qýaný, ózgeni qýandyrý. Ózi qýaný – qasietti ai kele jatyr dep, Alla Taǵalanyń qasietti qylǵan nárselerine qýaný. Musylmandar Ramazan aiynyń kele jatqanyna qýanýǵa tyrysýy kerek. Al ózgeni qýandyrý degen ne? Mysaly otbasyly adam úide áielimen, bala-shaǵasymen otyryp, Ramazan kele jatyr, muqtaj adamdarǵa tamaq tarataiyq, sadaqa bereiik dep igi isterdi josparlap, merekege daiyndalǵandai qýanyp, ózgelerdi qýandyrsa, bul nur ústine nur", — deidi imam.
"Sahabalar aitady: "Paiǵambarymyz(s.ǵ.s.) óte jomart adam edi, biraq Ramazan kelgen kezde odan saiyn jomart bolyp ketetin edi" dep. Ramazan aiynda adam ózi ózgerýge tyrysýy kerek. Óitkeni bul Alla men quldyń arasyndaǵy syr bolyp eseptelinedi. Biz namazǵa jyǵylǵandardy, qajylyqqa barǵandardy kóremiz, al oraza kórinbeitin ǵibadat. Ishki dúniesiniń Alla Taǵalaǵa tolyq berilýine septigin tigizetin qasietti ǵibadat. Jáne de Ramazan aiynda saýapty amal jasaǵan bolsa, ai bitken soń da ony jalǵastyrýy kerek. Eger Ramazannan keiin de adamnyń minez-qulqy, izgi amaldary jalǵasyp jatatyn bolsa, bul onyń orazasynyń qabyl bolǵandyǵynyń áseri dep aitady ǵulamalar", — dedi Qydyrmin.
