Áleýmettik jelide jeti balanyń anasy týraly beinejazba paida boldy. Videoda kópbalaly ana ózin meshitke kirgizbegen bas imamdy aiyptaidy, dep habarlaidy Ulysmedia.kz.
Aty-jóni beimálim áieldiń aitýynsha, ol jeti balasymen birge qonatyn jer tappaǵan. Amaly qalmaǵan kelinshek elordadaǵy “Áziret Sultan” meshitine baryp, bir tún qonyp shyǵýǵa ruqsat suraǵan.
“Imamǵa jaǵdaiymdy aityp edim, ol aiǵailap, ishke kirip ketti. Meni meshittiń ishine jibergen joq. Qazir sizderdiń bergen aqshalaryńyzben qonaqúige túnep shyǵamyn. Ol jaqqa da jeti balamen kirgize me, bilmeimin”, – deidi kelinshek.
Osy jaǵdaiǵa bailanysty “Áziret Sultan” meshiti túsinikteme berdi.
“Kópbalaly kelinshek 20 shilde kúni keshki saǵat 19:00 kezinde (ekinti namazynan keiin) meshitke kómek surap keldi. Ol meshittiń kúzetshisinen ózin balalarymen birge meshitte qondyrýyn talap etken, tamaq berýdi suraǵan.
Sol ýaqytta «Áziret Sultan» meshiti bas imamynyń mindetin atqarýshy Ádilhan Imanáliuly kelip, ol kisiden qandai kómek kerek ekenin suraǵan. Imam meshittiń ishki erejesi men tártibi boiynsha qulshylyq úiinde qonýǵa ruqsat berilmeitinin jetkizdi. Alaida imam meshittiń qarjylyq múmkindigi aiasynda oǵan materialdyq kómek kórsetiletinin aitty.
Ókinishke qarai, álgi áiel bul usynysty qabyldamai, óz ustanymynan qaitpai, meshitte ǵana qonatynyn aitty. Osylaisha, ashýǵa berilgen kúii imamnyń usynystaryn tyńdamastan, meshitten shyǵyp ketti.
Osy oraida aitarymyz, “Áziret Sultan” meshiti kómek surap kelgen shynaiy muqtaj adamdarǵa qashan da qol ushyn sozyp keledi. Alaida meshittiń ishki erejesi men tártibine sáikes qulshylyq úiinde qonýǵa bolmaitynyn taǵy da qaperge salamyz. Mundai jaǵdaida imamdar múmkindiginshe qonatyn basqa oryn taýyp berýge tyrysady.
Din qyzmetkeri eshqashan eshkimge beipil sóz aityp, meshitten qýyp shyqqan emes. BAQ ókilderi men áleýmettik jeli qoldanýshylaryn bul oqiǵaǵa bailanysty birjaqty pikir taratpaýyn suraimyz”, – delingen habarlamada.
