Elimizdegi týristik ortalyqtar men Túrkistan qalasyndaǵy "Áziret Sultan" memlekettik tarihi-mádeni qoryq-mýzeiiniń Jerorta teńizi aimaǵyndaǵy eń iri týristik kórmege qatysýyna Qazaqstan Respýblikasynyń Mádeniet jáne sport ministrligi men Qazaqstannyń Grekiiadaǵy elshiligi qoldaý kórsetip, "Áziret Sultan" memlekettik tarihi-mádeni qoryq-mýzeii Qoja Ahmet Iasaýidiń muralary jáne Túrkistan óńirindegi kieli-tarihi jerler jaily kórmeni sheteldikter nazaryna usyndy, dep habarlaidy "Ult aqparat".
Týrister úshin Túrkistandaǵy eń mańyzdy oryndar jaily 1871-1872 jyldary túsirilgen A.Kýnnyń fotoalbomynan týyndylar jáne keseneniń ár jyldardaǵy beineleri men Túrkistannyń kórinisteri, taiqazan, shyraǵdan sýretteri, Qoja Ahmet Iasaýi men taiqazannyń maketteri tanystyrylsa, Iasaýi kesenesi men Qylýet jerasty meshiti, Shyǵys monshasy, Gaýhar ana, Ýkasha ata kesenesi men qudyǵy, Saýran qalashyǵy syndy tarihi oryndardyń 3D týr nusqasy Elbasymyzdyń tsifrlandyrý júiesi negizinde daiyndalyp, halyqaralyq kórmede alǵash ret kózildirik arqyly kórsetildi.
Sonymen qatar, qoryq-mýzeidiń tarihi oryndary men mýzei haqynda úsh tilde jaryq kórgen býklet kitapshalary men jádigerlerdiń katalog kitaptary da kórme ekspozitsiiasynan oryn aldy. Otandyq týristik ortalyqtar «Qazaqstanǵa saiahat jasa» jarnamalyq uranymen túrli mádeni baǵdarlama usynyp, elimizdiń kórikti jerlerimen birge qazaqtyń salt-dástúr, ádet-ǵurpy jáne tól ónerimen tanysty. Qazaqtyń dástúrli ánderi men termesin tyńdaǵan qalyń kópshilik arqan tartyp, asyq atý oiynyna da belsene qatysty.
Úsh kún ishinde 20 myńnan asa sheteldik tamashalap úlgergen qazaqstandyq kórmege 27 jyl buryn Qazaqstannan Grekiiaǵa qonys aýdarǵan Georgii jáne Olga esimdi erli-zaiyptylar kelip, týǵan jer muralaryn kórip, kózderine jas aldy.
"Qazaqstandyq kórme jóninde teledidardan estip Saloniki qalasynan 70 shakyrym jerden arnaiy keldik. Qazaqstandy kórmegenimizge de 10 jylǵa jýyqtady. Janymyz grek bolǵanymen - júregimiz qazaq. Týǵan jerdi qatty saǵyndyq. Baýyrsaqtan dám tatyp, ózimizge tanys jerlerdiń sýretin tamashalap, qazaq jurtynyń ystyq yqylasy, mol meiirimi qosa jetkendei erekshe sezimge bólendik", - dedi Georgii.
Qazaqstannyń Grekiiadaǵy Tótenshe jáne ókiletti elshisi keńesshisi Timýr Sultanǵojin de kórmeni uiymdastyrýshy qazaqstandyqtarǵa alǵysyn bildirdi. Aldaǵy ýaqytta Qazaqstan men Grekiia arasyndaǵy týristik bailanys nyǵaiyp, tarihi-kieli jerlerge bai qazaq jerine sheteldik saiahatshylardyń nazaryn aýdarýǵa elshilik te qoldaý bildiretinin jetkizdi.
"Buǵan deiin "Áziret Sultan" memlekettik tarihi-mádeni qoryq-mýzeii TÚRKSOI halyqaralyq uiymynyń qoldaýymen Túrkiia Respýblikasynda da kórme uiymdastyryp, birqatar iri qalalaryna Iasaýi muralaryn nasihattaǵan bolatyn. Eýropalyq mádeniettiń damýyna úlken áser ete otyryp týrizm salasy damyǵan, ásem landshafty araldarǵa bai grek elindegi bul saparymyz Elbasy Nursultan Ábishuly Nazarbaevtyń "Bolashaqqa baǵdar: Rýhani jańǵyrý" baǵdarlamalyq maqalasyn keńinen nasihattaý jáne "Áziret Sultan" memlekettik tarihi-mádeni qoryq-mýzeiiniń 40 jyldyǵy, Túrkistan qalasynyń oblys ortalyǵy atanýyna da arnalyp otyr. Grekiiaǵa jasalǵan sapar barysynda birqatar týristik kelissózder júrgizdik, mádeni-tarihi muralardy da dáriptedik. Tek kórmeni ǵana kórsetip qoimai ulttyq óner, salt-dástúr, ulttyq oiyndardy da barynsha nasihattadyq. Munda kelgen qazaqstandyqtardyń árbiri tek ulttyq kiimder kiimdermen qyzmet kórsetip, jan-jaqty mádeni, rýhani kelbetimizdi de keńinen kórsetýge kúsh saldyq. Eýropalyqtar boiy 2 metrden asatyn qazaqtyń has batyrlarymen de sýretke túsip, Almatynyń aportynan dám tatty. Aldaǵy ýaqytta tarihy tereń, mádeni murasy bai qazaq eline saiahattamaq niette", - deidi "Áziret Sultan" memlekettik tarihi-mádeni qoryq-mýzeiiniń direktory Ahmetjanov Nurbolat Qadyruly.
Kórmege kelýshilerdiń basym bóligi Qoja Ahmet Iasaýi jaily tarihtan habardar bolǵanymen muralaryn alǵash ret kózben kórdi. Sonymen qatar, elimizdegi birqatar tarihi oryndar jaily da kórme arqyly qyzyǵýshylyq bildirgen týrister Qazaqstan jerine saiahatqa kelmek.
Aita keteiik, týristik áleýeti damyǵan alpaýyt elderdiń kóshbasshy týristik ortalyqtary qatysatyn sharanyń basty maqsaty - qazaqstandyq týristik nysandar men tarihi oryndardyń mańyzyn tanystyrý, tájiribe almasý.
