QR Adam quqyqtary jónindegi ýákili Elvira Ázimova Memleket basshysynyń qańtardaǵy jappai tártipsizdikke qatysýshylardyń jazasyn jeńildetý týraly tapsyrmasynyń kei óńirde oryndalmai jatqanyn aitty, dep habarlaidy QazAqparat.
«Buqaralyq aqparat quraldarynda jáne prokýratýranyń atyna málimdeme jasaýǵa batyly jetken azamattardy qýdalaýdan ári qysym kórsetýden tyiylýymyz qajet. Prokýratýranyń BAQ pen áleýmettik jelidegi qoǵamdyq rezonans týdyrǵan shaǵymdarǵa jedel jáne jariia túrde áreket etýi mańyzdy. Protsessýaldyq is-áreketterdi júrgizý barysyndaǵy qatigezdik tanytý, advokattyń bolmaýy, psihologiialyq qysym kórsetý jáne basqa da zańbuzýshylyqtar týraly habarlamalar sýdialar men prokýrorlardyń tarapynan qaperge alynýy tiis. Bul ákmshilik jaza týraly sot sheshimin shyǵarýǵa da qatysty», - dedi Elvira Ázimova Eýropalyq odaq elderiniń adam quqyqtary jónindegi 10 elshisimen onlain kezdeý barysynda.
Onyń atap ótýinshe, 25 qańtarda elimizdiń Bas prokýratýrasy qańtar oqiǵasyna qatysty 9 257 ákimshilik is qaralǵanyn habarlaǵan.
Atalǵan istiń jartysyna jýyǵynda, iaǵni 4 584 iste sot aiyptalýshylarǵa eskertý ǵana bergen.
«Jappai tártipsizdikke deiin beibit sherýdiń bolǵany memlekettik deńgeide moiyndalǵanyn eskere otyryp, barlyq protsessýaldyq tetikterdi iske qosý qajet. Osyǵan orai, Bas prokýrordan arnaýly jáne tergeý prokýrorlaryna jergilikti jerlerde tiisti is-sharalardy qabyldaýdy tapsyrýyn ótinemin. Ókinishke qarai, biz Memleket basshysynyń aýyrlatatyn mán-jai bolmaǵan kezde jappai tártipsizdikke qatysýshylardyń jazasyn jeńildetý týraly tapsyrmasynyń barlyq óńirde birdei oryndalmaǵanyn baiqap otyrmyz», - dedi ol.
