Almatyda 2018 jylǵy Aziia oiyndarynyń jeńimpazdary men júldegerlerine qurmet kórsetildi, dep habarlaidy QazAqparat tilshisi.
QR Ulttyq Olimpiadalyq komiteniń habarlaýynsha, saltanatty sharaǵa Qazaqstan Ulttyq Olimpiadalyq komitetiniń bas hatshysy Daniiar Abýlgazin qatysty.
Qazaqstan Respýblikasy Úkimetiniń Qaýlysyna sáikes, Aziia oiyndarynyń chempiondary men júldegerlerine arnaiy syiaqy bekitildi. Altyn júlde iegerlerine 10 myń, kúmis júldegerlerge 5 myń, qola medal iegerlerine 3 myń AQSh dollary kóleminde syiaqy tartý etildi.
«Qazaqstan sportshylary Djakartadaǵy jazǵy Aziia oiyndaryna qatysyp, jalpy esebi 76 medal jeńip aldy. Qurlyq dodasynda sportshylarymyz el namysyn abyroimen qorǵap, olimpiadalyq sport túrlerinen jaqsy nátije kórsetti. Keibir úmit etken sportshylarymyzdyń údeden shyqpaǵan sátteri de kezdesti. Biraq bul - sport, eń bastysy, Tokiodaǵy jazǵy Olimpiada oiyndarynda sáttilik pen jeńis tileimiz. Kelesi jyldyń 1 qańtarynan bastap ulttyq qurama komanda bas bapkerleriniń ailyǵy eki esege kóbeitiledi. Sonymen qatar, UOK sportshylardyń Tokio Olimpiadasyna daiyndyǵyn moinyna alyp, atletter alańsyz daiyndalýy úshin bar jaǵdaidy jasaidy», - dedi Qazaqstan UOK bas hatshysy Daniiar Abýlgazin.
Sportshylar atynan karateden Aziada chempiony atanǵan Gýzaliia Ǵafýrova men shpagashy Dmitrii Aleksanin sóz aldy.
«Aziia oiyndaryna qarqyndy jattyǵý júrgizip, úlken daiyndyqpen attandyq. Sol aralyqta bizdi qoldaǵan bapkerlerge, jankúierlerge jáne Ulttyq Olimpiada komitetine kóp rahmet! Aziadada Qazaqstannyń alǵashqy altynyn ielenip, qalǵan sportshylarymyzǵa jol ashqanyma qýanyshtymyn», - dedi Aleksanin.
Oiyn qorytyndysy boiynsha Qazaqstan sportshylary 24 olimpiadalyq jáne Olimpiada baǵdarlamasyna enbegen 3 sport túrinen (djiý djitsý, sambo, kýrash) 15 altyn, 17 kúmis jáne 44 medal ielenip, jalpy esepte 9-shy orynnan kórindi. Atletterimiz 24 olimpiadalyq sport túrinen júlde aldy. Aziada tarihynda tuńǵysh ret shpagada semserlesýden jekelei synda medalǵa ie boldyq (D. Aleksanin, altyn medal). Sonymen qatar, esý slalomy (A. Kýlikov, qola), batýtta sekirý (P. Áliev, qola) jáne maýntinbaiktan (K. Kazantsev, qola) alǵash ret Aziia oiyndarynan júldege qol jetkizdik. Oiyn baǵdarlamasyna alǵash ret engen dziýdodan komandalyq aralas synda bizdiń komanda kúmis júldeger atandy. Segiz jyldyq úzilisten soń júzýden komandalyq estafetada qola medal ielenip, kórkem gimnastikadan qurlyq úzdigi ataǵyn qaitaryp aldyq. Nebary 16 jastaǵy gimnastarymyz Aziadany baǵyndyrǵan bolatyn.
Jalpy alǵanda, Aziia oiyndarynda 30 sportshymyz jeńimpaz atandy. 46 sportshy kúmis, 66 sportshy qola júldeger. Komandalyq sport túrlerin qosa eseptegende (142) árbir úshinshi qazaqstandyq sportshy Aziada medalin jeńip aldy. 17 komanda Aziadaǵa tolyqtai jańartylǵan qurammen qatysty. Aita ketý kerek, Qazaqstan komandasyndaǵy sportshylardyń basym bóligi Aziia oiyndaryna alǵash ret qatysyp otyr.
