Djakartada ótip jatqan Aziia oiyndarynda Myrzaǵali Aitjanov senim artqan jeti boksshydan jarys jolynda úsheýi ǵana qaldy.
QR Ulttyq olimpiadalyq komiteti baspasóz qyzmetiniń habarlaýynsha, búgin shirek finalda judyryqtasqan 49 kelidegi Temirtas Júsipov filippindik qarsylasyna ese jiberip, jarysty júldesiz aiaqtady. Ol qarsylasy Paalam Karlomen kezdesip, 1:4 esebimen jeńilis tapty.
Aita keteiik, osyǵan deiin qurama kóshbasshylarynyń biri 56 kelide synǵa túsken Qairat Eráliev, 52 keli salmaqtaǵy boksshymyz Azat Mahmetov jáne 60 kelige deiingi salmaqta synǵa túsken Samatáli Tóltaev qarsylastaryna jol berip, jarysty erte aiaqtaǵan bolatyn.
Al, jarysty ary qarai jalǵastyratyn úsh boksshymyzdyń biri - 69 keli salmaq dárejesinde synǵa túsip jatqan Aslanbek Shymbergenov. Ol keshe qazaqstandyq boksshylar arasynan birinshi bolyp jartylai finalǵa shyqqan bolatyn. Ekinshi boksshymyz — 64 keli salmaqtaǵy Bekdáýlet Ibragimov. Ol búgin shirek finalda tailandtyq Masýk Vittichaimen judyryqtasady. Úshinshi boksshymyz — 75 keli salmaqtaǵy Ábilhan Amanqul. Aziada oiyndarynyń ashylý saltanatynda Qazaqstan týyn kóterip shyqqan boksshymyz búgin shirek finalda taipeilik Kan Chiaveimmen qolǵap túiistiredi.
