QR Densaýlyq saqtaý ministri Ajar Ǵiniiat koronavirýsqa qarsy vaktsinanyń jańa legin satyp alý josparda joq ekenin aitty, dep habarlaidy QazAqparat.
«Búginde Qazaqstanda vaktsinanyń 4,5 mln dozasy bar. Bul mólsher búginde jetkilikti. Biz aldyńǵy 9-10 aiǵa eseptedik. Qazir vaktsinalardyń igerilýin, vaktsinanyń qajettiligin, halyq vaktsinany qalai alady, soǵan qaraimyz. Bári osyǵan bailanysty. Qazir búkil vaktsina satyp alyndy. Jańa legin satyp alý josparlanyp otyrǵan joq», - dedi ol Senattyń kýlýarynda.
Sondai-aq, ol ministrlik vaktsina satyp alýǵa dep biýdjetten 6,7 mlrd teńgeni ne úshin surap otyrǵandaryn túsindirdi.
«6,7 mlrd teńge degenge kelsek, Májiliste byltyr nege bul somadan bas tartyp, biyl qaita surap otyrǵanymyzdy suraǵan edi. 6,7 mlrd teńge adam papillomasyna qarsy vaktsina úshin suratylǵan bolatyn. Bul usynys qoldaý tappady jáne ministrlik oǵan kelisti. Óitkeni bul jańa vaktsina bolatyn. Pandemiia bolyp jatty da koronavirýsqa qarsy vaktsinatsiiany ótkizý mańyzdy boldy. Al halyqtyń vaktsinatsiiaǵa degen kózqarasy birkelki bolmaǵanyn bilesizder. Al bul vaktsina kóbine jas qyzdarǵa, jetkinshekterge salynady. Sondyqtan kún tártibinen alynǵan edi», - dedi Ajar Ǵiniiat.
Aitýynsha, biylǵy 6,7 mlrd teńgeniń áńgimesi sol kezdegi sanmen sáikes bolyp qalǵan kórinedi. Áitpese suralyp otyrǵan maqsaty byltyrǵydan bólek.
«Bul somanyń 4 mlrd teńgesin difteriia, kókjótel, poliomielit, gemofildi infektsiia siiaqty bes birdei aýrýǵa qarsy egiletin pentavaktsinaǵa suradyq. Taǵy 2 mlrd teńge ulttyq kúntizbedegi vaktsinatsiia sharalyryna suratyldy», - dedi ministr.
