Foto: Gov.kz
Qoja Ahmet Iasaýi atyndaǵy Halyqaralyq qazaq-túrik ýniversitetinde 30 jyldan astam ýaqyt boiy Túrki elderinen kelgen jastar bilim alyp jatyr. Jyl saiyn oqý ordasyna qazaq tilin úirený úshin ártúrli elderden stýdentter keledi, dep habarlaidy Ult.kz.
Biyl ýniversitettiń Daiyndyq ortalyǵynda Ázerbaijannan kelgen úshem – Zehra, Esra jáne Lala Azizovalar men Qyrǵyzstannan kelgen egizder – Batma jáne Zýýra Akkanalievalar bilim alyp jatyr. Qazaq tilin úirenýdi bastaǵandaryna nebári bir ai bolsa da, tyńdaýshylar erkin sóilep, óz oilaryn qazaq tilinde jetkize alady. Daiyndyq ortalyǵynda oqý ordanyń ishki granty negizinde Túrki memleketterinen kelgen jastar bilim alyp, qazaq tilimen qatar túrik jáne aǵylshyn tilderin de meńgeredi.
«Qazaqstanda joǵary bilim alýdy tańdaýymyzǵa birneshe sebep bar. Eń bastysy – túrki elderinen kelgen stýdenttermen tanysyp, ortaq mádenietimiz ben tarihymyzdy tereńirek tanyǵymyz keldi. Sondai-aq túrki áleminiń rýhani astanasy – Túrkistan qalasynda bilim alý biz úshin úlken mártebe», – deidi stýdentter.
Oqytýshylardyń aitýynsha, bilim alýshylardyń jańa tilderdi úirenýge degen qyzyǵýshylyǵy men yntasy joǵary. Úshem men egiz qyzdar Daiyndyq ortalyǵyn aiaqtaǵannan keiin óz qalaýyna sai mamandyqtar boiynsha bilimin jalǵastyrýdy josparlap otyr.
«Bizdiń túr-sipatymyz uqsas bolǵanymen, tańdaǵan mamandyǵymyz ártúrli. Birimiz – psiholog, birimiz – dáriger, endi birimiz muǵalim bolǵymyz keledi», – deidi úshem.
Aita keteiik, Qoja Ahmet Iasaýi atyndaǵy Halyqaralyq qazaq-túrik ýniversitetiniń Daiyndyq ortalyǵynda qazirgi tańda túrki memleketterinen kelgen 296 tyńdaýshy bar. Olar bir jyl kóleminde tildik daiyndyqtan ótip, qorytyndy emtihan nátijesinde tańdaǵan mamandyǵy boiynsha oqýyn jalǵastyrady.
