Ázerbaijan Prezidenti Ilham Áliev Ázerbaijan halqyn eki milliardynshy tonna munaidyń óndirilgenimen qutyqtady, dep jazady Trend.
Bakýde elde eki milliard tonna munai óndirilýine arnalǵan saltanatty rásim ótti. Geidar Áliev ortalyǵynda bolǵan sharaǵa Ázerbaijan prezidenti Ilham Áliev, SOCAR jáne VR ókilderi, munai ónerkásibiniń qyzmetkerleri qatysty.
Ázerbaijan prezidenti elde alǵash ret 1846 jyldan bastap munai óndirile bastaǵanyn aityp, ázerbaijan halqyn munaidyń eki milliardynshy tonnasynyń óndirilýimen quttyqtady. «Ázerbaijan «qara altyndy» adam kapitalyna ainaldyra bildi. Biz munaidan alǵan tabysymyzdy tiimdi paidalanyp keldik, muny búgingi tańda álemdik qoǵamdastyq ta moiyndap otyr. Kóptegen elderde bai munai ken oryndary bola tura, halqy kedeishilikte ómir súrýde. Al Ázerbaijanda munai - halyqty berekege keneltip, damýdyń, turaqtylyqtyń, qýattyń qainar kózine ainalyp otyr. Búginde munai-gaz salasy Ázerbaijannyń egemen el bolýynda, eldiń ekonomikalyq áleýetin qalyptastyrýda zor mańyzǵa ie, muny barsha jurt bilýi tiis», - dedi Áliev.
Ázerbaijan prezidentiniń sózine qaraǵanda, eldegi anyqtalǵan munai qory 1,5 milliard tonnaǵa jetedi, taǵy da eki milliard tonnaǵa jýyq munai bar dep boljam jasalǵan.
«Ázerbaijandaǵy tabiǵi gaz qory jaily aitar bolsaq, 2,6 trillion tekshe metr kóleminde tabiǵi gaz qory anyqtalǵan, taǵy úsh-tórt trillion tekshe metr gazǵa boljam jasalyp otyr. «Azeri-Chyrag-Giýneshli» ken orny kem degende 2050 jylǵa deiin jumysyn jalǵastyrady. «Shah Deniz» ken orny kem degende 100 jylǵa deiin qyzmet etedi», - dedi Áliev.
