Foto: Radio 1
Ázerbaijan Reseimen josparlanǵan barlyq resmi jáne mádeni sharalardy doǵardy. Bul sheshim Ekaterinbýrgtegi politsiia reidteri kezinde eki ázerbaijan azamatynyń qaza tabýyna bailanysty qabyldandy, dep habarlaidy Ult.kz.
Ázerbaijan tarapy Reseidiń quqyq qorǵaý organdary ázerbaijan azamattaryna ultyna bailanysty qatygezdik kórsetkenin málimdedi.
2025 jylǵy 27 maýsymda Ekaterinbýrg qalasynda politsiia ázerbaijan azamattary turatyn páterlerge reid júrgizip, nátijesinde eki adam qaza taýyp, birnesheýi aýyr jaraqat alǵan, al toǵyz adam ustalǵan.
Osy oqiǵaǵa bailanysty Ázerbaijannyń Syrtqy ister ministrligi Resei elshiliginiń ýaqytsha senimdi ókilin shaqyrtyp, qatty narazylyq bildirdi. Ministrlik oqiǵanyń tolyq zerttelýin jáne kinálilerdiń jaýapkershilikke tartylýyn talap etti.
Osydan keiin Ázirbaijan tarapy Reseidiń ártisteri men mádeni uiymdary qatysatyn mádeni sharalardyń bárin toqtatatynyn málimdedi.
Resmi málimdemeni Ázirbaijannyń mádeniet ministrligi taratty. Onda bul sheshimniń sebebi retinde «Reseidiń quqyq qorǵaý organdary tarapynan Ekaterinbýrg qalasynda ázirbaijan ultynyń ókilderine qarsy jasalǵan qasaqana, maqsatty jáne sotsyz zorlyq-zombylyq pen kisi óltirý áreketteri» kórsetilgen. Ázirbaijan biligi mundai jaǵdailar jiilep, únemi qaitalanyp bara jatqanyn da atap ótti.
