Baký Armeniiaǵa Kelbadjar aýdanynan áskeri men turǵyndaryn áketýge kóbirek ýaqyt berip, ýaǵdalasqan merzimdi 25 qarashaǵa deiin sozdy. Bul aqparatty Ázerbaijan prezidentiniń kómekshisi, prezident ákimshiliginiń syrtqy saiasat jónindegi bólim jetekshisi Hikmet Gadjiev habarlady. Ázerbaijan, Armeniia jáne Resei basshylary qol qoiǵan kelisimge sáikes, armian taraby aýmaqtan 15 qarashaǵa deiin ketýi tiis bolǵanmen úlgere almaǵan.
Gadjievtiń sózine qaraǵanda, armian biligi áskerdi áketý merzimin uzartý týraly ótinishti Bakýǵa Resei arqyly jetkizgen. Baký ótinishti oryndaǵan. Kelbadjar aýdany men Armeniiany jalǵaityn jalǵyz jol arqyly bar ásker men turǵyndardy áketýdiń ońai emestigin ázerbaijan jaǵy da moiyndaǵan.
Ázerbaijan qorǵanys ministrliginiń ókili Gýsein Mahmýdovtyń aitýynsha, armian jaǵy turǵyndardy áketkennen keiin bul aýmaqta áserbaijan áskeri ornalastyrylady. Onyń sózine qaraǵanda armian turǵyndary aýmaqtan qarsylaspai ketip jatyr.
"Eshqandai arandatý áreketi bolmaidy dep oilaimyn" dedi ol.
Mahmýdov ázerbaijan áskeriniń Kelbadjar aýdanynan turǵyndardy kóshirý protsesine aralaspai otyrǵanyn da atap ótti.
Jeksenbi, 15 qarashada Resei qorǵanys ministrliginiń ulttyq ortalyq basqarmasy Taýly Qarabaqqa qaitatyn bosqyndar mingen 19 avtobýsty Lachin dálizi arqyly aýmaqqa jetkizýge atsalysyp jatqanyn habarlady. Taýly Qarabaqtaǵy soǵysqa bailanysty sol jaqtan ketýge májbúr bolǵan bosqyndardy qaitarý - Taýly Qarabaqta ornalasqan reseilik gýmanitarlyq ortalyq mindetteriniń biri. Ortalyq 14 qarashadan bastap jumys istei bastaǵan.
