Búgin Elbasy Nursultan Nazarbaev Parlament palatalarynyń birlesken otyrysynda joǵary bilim berýdiń sapasy men qoljetimdiligin arttyrýdy atap ótip, stýdentterdi jataqhanamen qamtý máselesin qozǵady. Osy oraida Májilis depýtaty Azat Perýashev kezinde óziniń de qazaq jastarynyń baspanasyz júrgenin aityp, olardy jataqhanamen qamtamasyz etýdiń jolyn usynǵanyn, biraq bul bastama BAQ tarapynan synǵa ushyraǵanyn málimdedi, dep habarlaidy Baq.kz.
«Byltyr men aýyldan qalaǵa kelgen qazaq jastarynyń jaǵdaiyn oilap, olardy jataqhanamen qamtamasyz etý týraly bastama kóterdim. Ókinishke qarai, orystildi basylymdar meni basqasha túsindi», - dedi ol.
Osy oraida depýtat aýyldardan qalalarǵa elimizde kem degende 300 myń jas kóship keletinin, al elimizdegi memlekettik baǵdarlama boiynsha tek 100 myń páter salynatynyn jetkizdi. Onyń aitýynsha, qalaǵa kelgen 300 myń jastyń 200 myńy páterge qol jetkize almai, júredi eken.
«Olar tapqan aqshasyn jalǵa alǵan páterine jumsaidy. Tipti, jastar «páterdi ipotekaǵa alamyz» degen úmitten aiyrylyp otyr. Al meniń ótken jylǵy jataqhanalar týraly usynysymdy orystildi basylymdar bytshytyn shyǵaryp, jamandap tastaǵan. Qazaqtar da ( qazaqtildi basylym – avtor) meniń bastamamdy durys túsingen joq. Biraq barlyǵy qatelesedi ǵoi. Ol - bólek áńgime. Biraq elimizde jastardy baspanamen qamtamasyz etý máselesi óte ótkir kúiinde qalyp otyr. Qazaqstanda qanshama ýniversitetter men bilim beretin mekemeler óz stýdentterin jataqhanamen tolyq qamti almai otyr», - dedi Azat Perýashev.
Sonymen qatar depýtat búgin jastardy jataqhanamen qamtamasyz etý máselesine Prezidenttiń ózi aralasqanyn aityp, bul másele aldaǵy ýaqytta sheshimin tabady degen úmitte ekenin jetkizdi.
«Osy oraida Elbasy Nursultan Nazarbaev atalǵan máselege memlekettik turǵydan qaraý qajettigin aityp, arnaiy tapsyrma berdi. Qazirgi tańda memleket osy máselege nazar aýdardy. Prezident atalǵan máseleniń burynnan bar ekenin aitty. Endi ony sheshý úshin tiisti jumystar jasalýy qajet», - dep túiindedi sózin Azat Perýashev.
