«Qaraǵandy oblysynyń kásipodaqtary» oblystyq kásipodaqtar birlestiginiń tóraiymy Janna Ýalieva 18 jasqa tolmaǵandardyń mitingterge qatysýyna qarsy ekenin aitty, dep habarlaidy QazAqparat.
Bul týraly ol Nur-Sultanda ótken beibit jinalystar týraly zań jobasyn talqylaý kezinde málimdedi.
«Bizde aitylǵan normaǵa qatysty shaǵymdar bar. Zańda «qatysýshy» degen uǵym bar. Qatysýshy - bul 18 jasqa tolǵan adam. Nege qatysýshynyń jasy tómendeýi kerek? Buǵan saqtyqpen qaraý kerek. Birqatar negizdi ideialar bar. Bul turǵyda biz balalardyń qatysýshy bolýyna qarsymyz. Balalar UBT-ǵa daiyndalýdyń ornyna, mitingterge baryp, óz pikirlerin aita ma? Uiymdastyrýshylar bul balalardy óz maqsattary úshin qoldanýy múmkin», - deidi Janna Ýálieva.
Onyń pikirinshe, beibit sherýler saiasi ideiany ǵana ustanbaidy.
«Ártúrli qaýymdastyqtar bar. Eger biz balalarǵa 14 jastan bastap beibit sherýge qatysýǵa ruqsat etsek, osy jastaǵy balalar normany buzǵany úshin jaýapqa tartylatynyn túsinýimiz kerek. Sonda bizde 14 jastaǵy sottalýshylar bolady jáne olar qylmystyq jaýapkershilikke tartyla ma?», - deidi ol.
«Qaraǵandy oblysynyń kásipodaqtary» oblystyq kásipodaqtar birlestiginiń tóraiymy Janna Ýalieva bul zań jobasy Qaraǵandyda qyzý talqylanyp jatqanyn aitty.
«Talqylaýǵa qoǵam men memlekettik qurylym belsene qatysty. Zań kontseptýaldy, zańnyń ideiasy bar. Ideia jinalystarda konstitýtsiialyq quqyqtardy qamtamasyz etýge negizdelgen», - deidi Janna Ýálieva.
