Azamattyq aviatsiia komiteti ushaqta júk alyp júrý erejelerin túsindirdi, dep habarlaidy "Ult aqparat".
Aita keteiik, joljúk pen qol júgin alyp júrý normalary boiynsha suraqtar jolaýshylar arasynda erekshe ózekti.
Osyǵan bailanysty «Qazaqstannyń aviatsiia ákimshiligi» AQ jolaýshylarǵa arnalǵan jiyntyq aqparatty jáne áýe kóliginde joljúk pen qol júgin alyp júrý qaǵidalary boiynsha jalpy usynymdardy jariialaýdy jón kórdi.
Qazaqstan Respýblikasynyń áýe keńistigin paidalaný jáne aviatsiia qyzmeti týraly Zańnyń 76-babynyń 1, 2-tarmaqtaryna sáikes jolaýshylardy, joljúkti jáne júkterdi kommertsiialyq áýemen tasymaldaý áýe bileti negizinde júzege asyrylady. Bul - jolaýshynyń áýemen tasymaldaý shartynyń talaptarymen tanysqanyn rastaý.
Qol júgi men joljúkti tegin alyp júrýdiń salmaǵyn, ólshemderin jáne normalaryn Áýe kóligimen jolaýshy, bagaj jáne júk tasymaldaý qaǵidalarynyń 59, 62-tarmaqtaryna sáikes aviakompaniia belgileidi.
Bagajdy tirkegennen keiin aviakompaniia onyń saqtalýyna jaýap beredi. Jolaýshyǵa joljúk nómiri bar birkanyń úzbeli talonyn joljúk jetkizý beketinde alynǵanǵa deiin saqtaý kerek.
Joljúk keshiktirilgen, jetispegen, búlingen nemese joǵalǵan jaǵdailarda, sondai-aq bagaj túbirtegi men joljúk nómiri bar birkanyń úzbeli talonyn kórsetpei joljúk berilgen jaǵdaida tasymaldaý kezinde aqaýlyq týraly akt toltyrylady.
Múmkindigi shekteýli adamdar men júrip-turýy shekteýli toptar qataryndaǵy jolaýshylar jeke paidalanýǵa arnalǵan zembilderdi jáne kreslo-arbany ózimen birge joljúk retinde qosymsha tegin alyp júre alady.
Joljúkti, qol júgin, sondai-aq arnaiy joljúkti alyp júrý qaǵidalary men normalary boiynsha egjei-tegjeili aqparat aviakompaniialardyń resmi veb-saittarynda jariialanady.
«Ishki reisterde joljúkti tasymaldaý kezinde týyndaǵan daýlar jergilikti zańnama sheńberinde qaralady. Halyqaralyq baǵyttar boiynsha shart sheńberinde aviakompaniialardyń jolaýshylar aldyndaǵy jaýapkershiligi qatysýshy aviatasymaldaýshylardyń qaǵidalarymen retteledi jáne týyndaǵan barlyq daýlar qatysýshy tarap memleketteri ratifikatsiialaǵan konventsiialar men halyqaralyq kelisimderdiń erejelerine sáikes qaralady» delingen habarlamada.
