Aqtóbe oblysynyń Politsiia departamenti azamattarǵa 200 myń teńge aqshalai syiaqy úshin júrgizýshi kýáligin alyp berýmen ainalysqan uiymdasqan qylmystyq topty ustady. Top músheleri Mamandandyrylǵan HQKO-nyń qyzmetkerleri bolyp tabylady, - dep habarlaidy "Ult aqparat" Polisia.kz saityna silteme jasap.
Júrgizilgen jedel-izdestirý is-sharalary barysynda ekzamen tapsyrýǵa arnalǵan synypqa kireberiste mindetti teoriialyq emtihannan ótý kezinde HQO qyzmetkerleri ózderiniń qylmystyq roline sáikes belgili bir kandidattardy metall izdegishpen teksermei, tizim boiynsha kedergisiz ótkizgeni anyqtaldy.
Sonymen qatar aldyn ala aqsha bergen kandidattardyń tizimin azamattyq tulǵalar, iaǵni top músheleriniń sybailastary jasap otyrǵan. Emtihan tapsyrýshy qulapqaptarmen, mikrofonmen jáne kameramen jabdyqtalyp, kompiýter synybyna ótip, monitorda shyqqan suraqtardy qylmystyq toptyń múshesine kórsetip otyrǵan.
Al ol óz kezeginde jaldamaly páterde otyryp, oǵan durys jaýaptardy nusqaǵan. Sondai-aq toptyń taǵy bir múshesi emtihan kezinde kórshi kabinette otyryp, olardy roýterdiń kómegimen internetpen qamtamasyz etken. Osylaisha azamattar testti zańsyz tapsyryp, júrgizýshi kýálikterine qol jetkizgen.
Jaldamaly páterdi tintý kezinde politsiia qyzmetkerleri 6 690 000 teńge, 1800 AQSh dollaryn tárkiledi. Sondai-aq mini-qulaqqaptar, kishkentai beinekameralar, kameralary bar emtihan tapsyrýǵa arnalǵan jiletter, qýattaý qurylǵysy jáne taǵy da basqa zattar tárkilendi. Sonymen qatar jeke tekserý kezinde bir ekzamen tapsyrýshydan marihýanaǵa uqsas ósimdik tektes zat tabyldy.
Arnaiy operatsiia barysynda Mamandandyrylǵan HQKO-nyń aýlasynda óz kezegin kútip turǵan, ózine qajetti tehnikamen jabdyqtalǵan taǵy bir azamat ustaldy.
Qazirgi ýaqytta qylmystyq shemaǵa tartylǵan adamdardyń áreketteri qujattaldy jáne tergeý amaldary júrgizilip jatyr.
