Búgin QR Úkimetinde ótken baspasóz konferentsiiasynda QR Ulttyq banki tóraǵasynyń orynbasary Oleg Smoliakov azamattardyń borysh júktemesin azaitý jónindegi Prezident Jarlyǵynyń oryndalý barysy týraly aitty, dep habarlaidy "Ult aqparat".
O. Smoliakov atap ótkendei, Ulttyq bank, «Memlekettik kredittik biýro» AQ, «Problemalyq kreditter qory» AQ ekinshi deńgeili banktermen jáne mikroqarjy uiymdarymen (MQU) birlese otyryp, Qazaqstan Respýblikasy Prezidentiniń 26.06.2019 jylǵy «Qazaqstan Respýblikasy azamattarynyń borysh júktemesin azaitý sharalary týraly» Jarlyǵyn iske asyrý aiasynda barlyq qazaqstandyqtarǵa bankter men MQU-daǵy kepilsiz tutynýshylyq qaryzdary boiynsha 2019 jyldyń 1 shildesindegi jaǵdai boiynsha eseptelgen aiyppuldar men ósimpuldardy esepten shyǵarý týraly sheshim qabyldady.
«Osy jyldyń 30 shildesinde bankter men MQU 1 192 834 qaryz alýshyǵa jalpy 33 620 mln teńge somasyna kepilsiz tutynýshylyq qaryzdar boiynsha aiyppuldar men ósimpuldardy esepten shyǵarý jumystaryn aiaqtady», — dedi Ulttyq bank tóraǵasynyń orynbasary.
Aiyppuldar men ósimpuldar eń aldymen bankter men MQU-nyń qarajaty esebinen esepten shyǵaryldy.
Biylǵy 15 tamyzda Problemalyq kreditter qory 10 086 mln teńge kóleminde bankter men MQU-ǵa aiyppuldar men ósimpuldar boiynsha esepten shyǵarylǵan somanyń 30% ótedi.
«Osylaisha, 2019 jyldyń 1 shildesindegi jaǵdai boiynsha barlyq azamattarǵa aiyppuldar men ósimpuldardy esepten shyǵarý jumystary tolyq aiaqtaldy», — dedi O. Smoliakov.
Bankter men MQU-da kepilsiz tutynýshylyq qaryzdar úshin 300 myń teńgege deiingi mólsherde bereshekti óteý azamattardyń kelesi sanattary boiynsha júzege asyrylady:
1) kóp balaly otbasylar;
2) asyraýshysynan aiyrylý jaǵdaiyna bailanysty tólemder alatyn otbasylar;
3) múmkindigi shekteýli balalary, 18 jastan asqan bala kezinen múgedek balalary bar otbasylar;
4) memlekettik ataýly áleýmettik kómek alýshylar;
5) jetim balalar;
6) jiyrma toǵyz jasqa tolmaǵan, kámeletke tolǵanǵa deiin ata-anasynan aiyrylǵan balalar.
Memlekettik qoldaý alý úshin qaryz alýshynyń kepilsiz tutynýshylyq nesieler boiynsha bereshek somasy 2019 jylǵy 1 maýsymdaǵy jaǵdai boiynsha 3 mln teńgeden aspaýy kerek.
Osy jyldyń 20 tamyzyndaǵy jaǵdai boiynsha Eńbek jáne halyqty áleýmettik qorǵaý ministrligi usynǵan tizimder negizinde 507 363 azamat anyqtaldy, olardyń 105 174,8 mln teńge kóleminde bereshekteri óteledi.
«Búginde aqsha bankter men MQU-ǵa aýdaryldy, jaqyn arada bereshekter óteledi. 5 qyrkúiekke deiin bankter qaryz alýshylardyń shottaryna bul qarajattardy taratý jumystaryn júrgizýi kerek. Al 9 qyrkúiekte Úkimetke jáne osy baǵdarlamanyń operatorlaryna qarajattyń shottarǵa aýdarylǵany týraly aqparatty berýi tiis», — dedi O. Smoliakov.
Sonymen qatar, ol qaryzdy óteý úshin azamattarǵa bankter men MQU-ǵa júginýdiń qajeti joq ekenin, barlyq jumysty kredittik uiymdar derbes júrgizetinin basa aitty.
Sondai-aq, Prezidenttiń Jarlyǵy aiasynda Ulttyq bank azamattardyń qaryzdarynyń basqarylmaityn ósý qaýpin tómendetýge baǵyttalǵan bolashaq sharalardy daiyndady. Ulttyq Bank tóraǵasynyń orynbasary qaryz alýshylardyń nesieni ótemek túgili, ózderine ómir súrýge jetetin belgili bir minimaldy kiristeri bolmai turyp, tutynýshylyq kepilsiz nesieler alatyn jaǵdailar jiilep ketkenin aitty.
Sondyqtan Memleket basshysynyń Jarlyǵyna sáikes tabysy eń tómengi kúnkóris deńgeiinen tómen azamattarǵa kepilsiz tutynýshylyq nesie berýge tyiym salý týraly sheshim qabyldandy.
«Árdaiym "Tabysty qalai anyqtaýǵa bolady?", "Ony qalai rastaýǵa bolady?" degen suraqtar týyndaityn. Biz usynyp otyrǵan túzetýler jobalarynda tek resmi kirister ǵana eskerilmeidi. Tabysty baǵalaý tek resmi kiristerge ǵana negizdelmeidi, sonymen birge shottaǵy aqsha ainalymyna, jyljymaly jáne jyljymaityn múliktiń bolýyna, kommýnaldyq tólemderge de negizdeledi. Múmkindiginshe barlyq kiris kózderin eskerý kerek», — dedi O. Smoliakov.
Kepilsiz tutynýshylyq nesielerge qatysty kapitaldyń jetkilikti bolýyna talaptardy arttyrý boiynsha qosymsha sharalar qarastyrylatyn bolady. Bul túzetýler tiisti memlekettik organdarǵa jiberilip, banktermen talqylanýda.
