Azamattardy áleýmettik qorǵaýdy kúsheitýge úsh jyldyń ishinde 1,3 trln teńge jumsalady. Bul týraly búgin Úkimet otyrysynda QR Premer-Ministriniń birinshi orynbasary - Qarjy ministri Álihan Smaiylov aitty, dep habarlaidy QazAqparat tilshisi.
Á.Smaiylov Memleket basshysy bergen tapsyrmalardy ýaqytyly oryndaý maqsatynda Qarjy ministrligi múddeli memlekettik organdarmen birlesip, eldiń tabysy men turmys sapasyn jaqsartýǵa baǵyttalǵan bastamalar boiynsha aldyn ala esepteýler júrgizgenin atap ótti.
«2019-2021 jyldarǵa qosymsha qajettilik - 2 trln teńge. Onyń ishinde 2019 jylǵa - 446,7 mlrd teńge qarastyrylǵan. Birinshi, qarajattyń basym bóligi jeke sanattaǵy azamattardy áleýmettik qorǵaýdy kúsheitýge baǵyttalady. Úsh jylǵa shamamen 1,3 trln teńge jáne 2019 jylǵa - 226,7 mlrd teńge. Ekinshi, azamattardyń jekelegen sanattaryn turǵyn úimen qamtamasyz etýge jyl saiyn 100 mlrd teńgeden 300 mlrd teńge qosymsha qarajat qajet bolady»,- dedi ol.
Ministrdiń aitýynsha, óńirlik infraqurylymdy damytýǵa erekshe kóńil bólinetin bolady. Ony qarjylandyrý respýblikalyq jáne jergilikti biýdjetterden 2025 jylǵa deiin 920 mlrd teńgeni quraidy. Respýblikalyq biýdjetten 2019-2021 jyldarǵa bul baǵyt boiynsha qosymsha 320,9 mlrd teńge bólinedi. Onyń ishine 2019 jyly 90 mlrd teńge qosymsha baǵyttaý josparlanyp otyr. Jergilikti biýdjetten jobalardy qosa qarjylandyrý úshin 101,1 mlrd teńge, onyń ishinde 2019 jyly 32 mlrd teńge bólý talap etiledi.
«Aýyl - el besigi» atty jobany júzege asyrýǵa qosymsha 90 mlrd teńge, onyń ishinde 2019 jyly 30 mlrd teńge qajet bolady. Eldiń tabysy men turmysyn jaqsartýǵa baǵyttalǵan tapsyrmalardy qarjylyq qamtamasyz etý maqsatynda kedendik jáne salyqtyq ákimshilendirýdi jaqsartý boiynsha birqatar sharalar qabyldanady. Sonyń ishinde kedendik ákimshilendirýdiń nátijesinde biýdjettiń kiris bóliginde úsh jyldyń ishinde 800 mlrd teńge qosymsha túsimder tartýǵa múmkindik beriledi. Biyl 200 mlrd qosymsha túsim bolady. Sondai-aq Memleket basshysy atap ótkendei, Ulttyq qordan da qarajat tartylady»,- dedi Á.Smaiylov.
