Azamattar qańtar oqiǵasy kezinde urlandy delingen 120 qarýdy óz erkimen tapsyrǵan. Bul týraly QR Ishki ister ministrligi tergeý departamentiniń bastyǵy Sanjar Ádilov ortalyq kommýnikatsiialar qyzmetinde ótken brifingide málim etti, dep habarlaidy QazAqparat.
«Qylmystyq elementter zańsyz ainalymǵa túsken qarýdy kez kelgen sátte beibit azamattarǵa qarsy paidalana alady. Osyǵan bailanysty qarýdy óz erkimen tapsyrý jáne kúdikti adamdar, atys jáne sýyq qarýdy zańsyz saqtaý jáne satý týraly qandai da bir aqparatty usyný qajettiligi týraly túsindirý jumystary jalǵasyp jatyr. Búgingi tańda azamattar óz erkimen 120 qarý tapsyrdy. Bul rette olardyń eshqaisysy qandai da bir jaýapkershilikke tartylǵan joq», -dedi Sanjar Ádilov.
Sondai-aq, ol qazirgi ýaqytta ishki ister organdary tergeýshileriniń óndirisinde 2 961 qylmystyq is bar ekenin eske saldy.
«Olar boiynsha tótenshe jaǵdai kezeńinde aýyr jáne asa aýyr qylmys jasaǵan 176 kúdikti kúzetpen qamalǵan. Bul rette buryn kúzetpen ustalǵan 245 adam jasalǵan qylmystyń aýyrlyǵyn jáne jeke basynyń minezdemesin eskere otyryp, qamaýdan bosatyldy.
Bul - buryn sottalmaǵan jáne óz erkimen kelgen zalaldyń ornyn toltyrǵan azamattar.
Olar eshqaida ketpeý týraly qolhat jazyp berdi, kepil, úiqamaq jáne jeke kepilgerlik sharalar qoldanyldy.
Jalpy, kúdikti adamdardyń kópshiligine qatysty kúzetpen ustaý túrinde bultartpaý sharasy tańdalǵan joq», - dedi IIM ókili.
