Aktrisa, prodiýser, rejisser, "Daryn" memlekettik syilyǵynyń jáne "Tarlan" syilyǵynyń laýreaty Nazgúl Qarabalina jeke ómirine qatysty kópshilik bilmeitin syryn bólisti, dep habarlaidy ult.kz.
Muhtar Áýezov atyndaǵy Qazaq memlekettik akademiialyq drama teatrynyń aktrisasy otbasyna qatysty orynsyz suraq qoiatyn adamdarǵa renishin bildirdi. Onyń aitýynsha, keibir jandar "nege bir baladan artyq týmadyń?" dep suraidy.
"Maǵan nege bir baladan artyq týmadyń dep suraq qoiatyndardy qandai adam dep aitsam eken? Ony nadandyq deimiz be, bilimsizdik deimiz be, odan joǵarylatyp aitý qiyn siiaqty. Qudai solai berdi, oǵan qarsy kele alamyz ba? Ulymyz ósip kele jatyr, oǵan shúkirshilik deimiz. Maǵan jaqyn adamdar jeke suraq qoimaidy, biraq alystaý adamdar men týraly bárin bilgisi keledi", – dedi aktrisa.
Sonymen qatar Nazgúl Qarabalina alǵashqy kúieýi Azamatqa ózi ǵashyq bolǵanyn ashyq aitty. Onyń sózinshe, akademiiada oqyp júrgen kezde Azamat oǵan birden kóńil bólmegen.
"Shyny kerek, akademiiada oqyp júrgende Azamat meni onsha unatqan emes. Azamatqa alǵash ǵashyq bolǵan men bolatynmyn. Jasyratyn eshteńesi joq. Azamattyń maǵan kóńili aýsa eken, kórse eken, baiqasa eken degen sátter boldy", – dedi ol.
Aktrisa sol kezde Azamatqa arnap albom jasaǵanyn da aitty. Onda ol Alladan ekeýiniń qosylýyn tilep, bolashaqta onyń ata-anasyna qamqor bolýǵa daiyn ekenin jazǵan.
"Azamat ol kezde basqa qyzdy unatyp júretin. Men albomyma "O, Alla Taǵala! Eger de Azamat maǵan nazar aýdarsa, biz ekeýimiz úilensek, onyń zeinetker ata-anasyna qaraityn edim. Onyń kópbalaly januiadan ekenin bilemin. Toǵyz aǵaiynymen jaqsy qarym-qatynasta bolamyn. Maǵan tek qana ekeýimizdiń qosylýymyzdy násip etshi" dep jazatynmyn", – dedi Nazgúl Qarabalina.
Óner iesiniń aitýynsha, bir kúni Azamat sol jazbalardy oqyp qoiǵan. Sodan keiin onyń kózqarasy ózgergen bolýy múmkin.
"Sony bir kúni Azamat oqyp qoiypty. Sodan keiin oilanǵan bolý kerek. Ondai adam kerek qoi. Ol tek eseppen úilendi. Meniń sezimim shynaiy boldy. Basynda eseppen úilendi, qazir endi jaqsy kóredi", – dedi aktrisa.
