Qazaqstannyń belgili aqyn-jazýshysy Oljas Súleimenovtiń eń tanymal kitaby «Az i Ia» alǵash ret qyrǵyz tilinde jaryq kórdi.
Búgin Bishkek qalasynda kitaptyń tusaýkeseri ótti.
Basylymnyń alǵysózinde Oljas Súleimenov: «Az i Ia» alǵash ret qyrǵyz tilinde shyǵarylyp otyr. Bul kitap álemniń kóptegen tilderine aýdarylmaq boldy. Biraq aýdarmalary durys shyqpai, tek qysqa túsindirmeler men basym deni saiasi mándegi kóptegen pikirler berildi.
Kitap orys tilin biletin, kóne orys eskertkishi mátinin túsine biletin oqyrmanǵa arnalǵan. Sondyqtan ol ýkrain, belarýs, ázerbaijan jáne burynǵy KSRO basqa tilderine durys aýdaryla aldy. Endi bul týyndy aǵaiyn qyrǵyz tilinde jaryq kórdi», - dep jazdy.
Kitap Qazaqstannyń Qyrǵyzstandaǵy Elshiliginiń qoldaýymen basyp shyǵarylǵan. Onyń aýdarmashysy - kóp jyldar boiy Qyrǵyz keńestik entsiklopediiasynyń ǵylymi redaktory bolyp jumys istegen, 200-den astam ǵylymi jáne ǵylymi-kópshilik maqalalardyń avtory Izilia Rahymova.
Basylymnyń shyǵarýshy redaktory - túrkitanýshy, epigrafshy, filologiia ǵylymdarynyń kandidaty Chetin Jumaǵulov, retsenziia jazǵan - Túrki akademiiasynyń akademigi, doktor, professor Qadyráli Qonqobaev.
Baspagerler kitaptyń taǵy bir tilde basyp shyǵarylýy kóp oqyrmannyń qyzyǵýshylyǵyn týdyryp, mádeniettiń beimálim tustaryn asha túsetinine senimdi. «Az i Ia» kitabynyń qyrǵyz tilindegi nusqasy eldegi barlyq mektepter men JOO-larǵa, sondai-aq shalǵaidaǵy aýdandarǵa jetkizilmek.
Bastapqy tiraj - 1000 dana. Kitap Nursultan Nazarbaevtyń «Qoǵamdyq sanany jańǵyrtý» jáne «Uly dalanyń jeti qyry» baǵdarlamalyq maqalalarynyń aiasynda jaryq kórgen. Sondai-aq basylymnyń qyrǵyz jazýshysy Shyńǵys Aitmatovtyń 90 jyldyǵy qarsańynda tanystyrylyp otyrǵany - este qalarlyq oqiǵa. Oljas Súleimenov Aitmatovtyń shyǵarmashylyǵyn joǵary baǵalap, onyń «Borandy beket» atty týyndysyn ǵasyr romany dep ataǵan.
