Almatynyń bas sanitar dárigeri Jandarbek Bekshin Almatyǵa qalai aýysyp kelgenin aityp berdi, dep habarlaidy "Ult aqparat".
«Birinshiden, sanitar dárigerler men epidemiologtar – sarbazdar. Kezinde bul jartylai áskeri nysan bolatyn. Men Almatyǵa deiin Qyzylorda, Atyraý, Mańǵystaý oblystarynda júielik baqylaý máselelerin rettep júrgen edim. Almatyǵa ushý kerek degende 40 minýtta jinalyp, sanitarlyq bortpen ushyp shyqtym. Sebebi, sol jaqqa gýmanitarlyq júk jiberip jatqanbyz. Sodan beri Almaty qalasynyń bas sanitar dárigerimin», - dedi ol.
Onyń aitýynsha, qalalyq taýarlar men qyzmetterdiń sapasy men qaýipsizdigin baqylaý departamentiniń basshysy Aizat Moldaqasymova densaýlyǵyna bailanysty demalys alǵan.
«Qazir departament basshysy Aizat Moldaqasymova úi karantininde demalysta bolǵan soń men jumys istep jatyrmyn. Meniń budan arǵy taǵdyrymdy QR DSM sheshedi. Biz – epidemiologtar, qaida bar dese sonda baryp jumys isteimiz», - dedi ol.
Bekshin óziniń QR DSM taýarlar men qyzmetterdiń sapasy men qaýipsizdigin baqylaý komiteti tóraǵasynyń orynbasary jáne Almatynyń bas sanitar dárigeri ekendigin aitty.
«Ol densaýlyǵyna bailanysty demalysta bolǵandyqtan, ministrlik QR Eńbek kodekesine sáikes eńbek qatynasyn sheshe almai otyr», - dedi Bekshin.
Jandarbek Bekshin Almatynyń bas sanitar dárigeri qyzmetine 18 sáýirde taǵaiyndalǵan bolatyn.
