Pavlodar oblysy ákiminiń orynbasary qyzmetine taǵaiyndalǵan Aizada Qurmanova áleýmettik bloktyń jumysyn qadaǵalaityn bolady, dep habarlaidy pavlodarnews.kz.
Pavlodar oblysynyń ákimi Ábilqaiyr Sqaqov jańa orynbasardy apparattyq keńes barysynda tanystyrdy. Ol Aizada Qurmanova áleýmettik sala jáne memlekettik basqarý máselelerin jaqsy biledi, sondai-aq atqarýshy jáne ókiletti organdarda basshylyq laýazymdarda mol tájiribege ie ekenin atap ótti.
Aizada Qurmanova 1970 jyly Jelezin aýdanynyń Abai aýylynda dúniege kelgen. 1992 jyly Pavlodar pedagogikalyq institýtyn, al 2015 jyly S.Toraiǵyrov atyndaǵy Pavlodar memlekettik ýniversitetiniń magistratýrasyn «Memlekettik jergilikti basqarý» mamandyǵy boiynsha támamdaǵan.
Eńbek jolyn 1992 jyly Mai aýdanyndaǵy Aqshiman orta mektebiniń orys tili men ádebieti muǵalimi bolyp bastaǵan. Alty jyl boiy direktordyń tárbie isi jónindegi orynbasary, sodan keiin sol oqý ornynyń direktory boldy. 1998-2002 jyldary Ekibastuz qalasyndaǵy № 10 orta mektepte muǵalim jáne direktordyń tárbie isi jónindegi orynbasary boldy.
2002 jyly memlekettik qyzmetke aýysty. Ekibastuz qalasynyń ishki saiasat bóliminiń bastyǵy, Ekibastuz qalasy ákiminiń orynbasary jáne Pavlodar oblysy ishki saiasat basqarmasynyń bastyǵy qyzmetterin atqardy.
2011 jyldan 2014 jylǵa deiin Lebiaji aýdanynyń ákimi boldy. 2014 jyldan bastap 2016 jylǵa deiin - «Nur Otan» partiiasy Pavlodar oblystyq filialy tóraǵasynyń birinshi orynbasary.
2016 jylǵy naýryzdan osy ýaqytqa deiin Qazaqstan Respýblikasy Parlamenti Májilisiniń depýtaty, Ekonomikalyq reforma jáne óńirlik damý komitetiniń múshesi boldy.
