Buryn Qylmystyq kodekstiń 367-babynyń 2-bóliginde kózdelgen «aitarlyqtai mólsherde para berý» qylmysy úshin eń joǵary sanktsiia 5 jylǵa deiin bas bostandyǵynan aiyrýdy qurasa, qazirgi jańa redaktsiiaǵa sáikes, jazanyń joǵary shegi 7 jylǵa deiin uzartyldy. Bul týraly «Antikor ortalygy» alańynda ótken brifingte Nur-Sultan qalasy boiynsha sybailas jemqorlyqqa qarsy is-qimyl departamentiniń basshysy Shyńǵys Qabdýla aitty, dep habarlaidy QazAqparat.
«Jyl sońynda QR DSM burynǵy vitse-ministrine qatysty qylmystyq is sotta qaraldy. Sonymen qatar biýdjet qarajatyn jymqyrý faktileri boiynsha «Gorkii atyndaǵy orys teatry» RMK, Astana aimaqtyq elektr jelilik kompaniiasy, Nur-Sultan qalasynyń Politsiia departamenti, «Sergek», «Astana halyqaralyq áýejaiy» AQ laýazymdy tulǵalaryna qatysty kóp epizodty ister aiaqtaldy, sondai-aq Ekonomikalyq tergeý departamentiniń tergeýshisin kinásiz adamdy qylmystyq jaýapkershilikke zańsyz tartý faktisi boiynsha jáne basqa da birqatar ister», - dedi Nur-Sultan qalasy boiynsha sybailas jemqorlyqqa qarsy is-qimyl departamentiniń basshysy.
Onyń aitýynsha, Sotqa jiberilgen jáne aqtalmaityn negizder boiynsha qysqartylǵan qylmystyq ister boiynsha tiisti uiymdarǵa QR QIJK 200-baby tártibinde 100% usynys engizý qamtamasyz etildi.
«Olar boiynsha 47 tulǵa ákimshilik jáne tártiptik jaýapkershilikke tartyldy, onyń ishinde 23 basshy. Ótken jyldyń 1 qyrkúiegindegi Memleket basshysynyń Qazaqstan halqyna Joldaýynda para berýshiler men deldaldardyń jaýapkershiligin kúsheitýdi tapsyrdy. Bul tásil halyqaralyq ozyq tájiribege tolyq sáikes keletinin atap ótken jón. Laýazymdy adamdardy paraǵa satyp alýmen ádeii ainalysatyn, ne zańsyz syiaqy berý kezinde deldal bolǵan adamdar, eleýli qylmystyq jaýaptylyqta bolýǵa tiis», - deidi ol.
Shyńǵys Qabdýla búgingi tańda Memleket basshysynyń tapsyrmasy oryndalǵanyn aitty.
«Qylmystyq kodekske tiisti túzetýler engizildi. Mysaly, eger buryn Qylmystyq kodekstiń 367-babynyń 2-bóliginde kózdelgen «aitarlyqtai mólsherde para berý» qylmysy úshin eń joǵary sanktsiia 5 jylǵa deiin bas bostandyǵynan aiyrýdy qurasa, tiisinshe bul áreket ortasha aýyr qylmys dep tanyldy. Al qazirgi jańa redaktsiiaǵa sáikes, jazanyń joǵary shegi 7 jylǵa deiin ulǵaityldy, bul avtomatty túrde aýyr quqyqtyq saldary bar sanatqa – iaǵni shartty túrde merziminen buryn bosatýǵa tyiym salý jáne qaýipsizdigi tómen qonys-koloniiasynda jazany birden óteýdiń múmkin emestigi kózdelgen», - deidi ol.
