Qazaqstan musylmandary dini basqarmasynyń tóraǵasy, Bas múfti Cerikbai qajy Oraz qazaqstandyqtardy Qurban ait merekesimen quttyqtady, dep habarlaidy "Ult aqparat".
«Qurban ait – isi musylmannyń ulyq meiramy. Ait kúnderi aǵaiyn-jurt bir-birine: «Ait qabyl bolsyn!» aityp, izgi tilekterin jetkizip, alǵystaryn jaýdyrady. Osy rette sizderge izgi nietpen Jaratqannyń jaqsylyǵyn tileimin.
Týys pen baýyrǵa, kórshi men dos-jaranǵa aittap barý, qadirli qonaqqa aittyq berip, úlkenniń alǵysy men batasyn alý – sonaý zamannan jalǵasyp kele jatqan musylmandyq dástúrimiz. Osy igi dástúrdi qoǵamda qaita jańǵyrtyp, jastarǵa úlgi-ónege kórsetýge shaqyramyn! «Qurban» sózi «jaqyn bolý», «jaqyndaý» degen uǵymdardy bildiredi. Musylman balasy ait kúni qurbandyq shalý arqyly Allaǵa degen aq nietin pash etedi», - delingen Bas múftidiń quttyqtaýynda.
Sondai-aq, Qazaqstan musylmandary dini basqarmasynyń tóraǵasy óziniń quttyqtaýynda qasietti merke kezinde mal baǵasyn sharyqtatpai, paidaǵa emes, saýapqa bólenýge shaqyrdy.
«Qurban aitta oryndalatyn eń qaiyrly amal – qurban shalý. Ait kúni jaǵdaiy bar kisiler qurban shalyp, ony qaraýsyz qalǵan qariialar men jetimderge, kópbalaly otbasylarǵa taratyp, saýap alýǵa tyrysady. Alaida, ait kúnderi mal baǵasy qymbattap ketetin jaǵdai jii oryn alady. Osy rette otandastarymdy mal baǵasyn sharyqtatpai, paidaǵa emes, saýapqa bólenýge úndeimin. Óitkeni, Qurban ait – qanaǵat pen qaiyrymdylyqtyń merekesi», - dedi Bas múfti.
