QR Premer-Ministriniń orynbasary Eraly Toǵjanov Májilis depýtattarynyń aldynda baǵany turaqtandyrý boiynsha atqarylyp jatqan sharalar týraly málimet berdi, dep habarlaidy QazAqparat.
«Memleket basshysy biznes ókilderimen kezdesýinde eńbekaqynyń jalpy ishki ónimdegi úlesin arttyrýdyń mańyzdylyǵyn aitqan bolatyn. Baǵdarlamany iske asyrý atalǵan kórsetkishti 31%-dan 38,5%-ǵa deiin arttyrýǵa múmkindik beredi. Sondai-aq jalpy kiristerdegi eńbek qyzmetinen túsken kiristerdiń úlesi 70%-dan 82%-ǵa deiin arttyrý kózdelgen.
Bul kórsetkishterge qol jetkizý joldary egjei-tegjeili taldanyp, baǵdarlama indikatorlaryna qol jetkizý jaýapkershiligi óńirler men salalyq ministrlikter bólinisinde bekitilgen», - dedi vitse-premer.
Sondai-aq, ol Úkimet Ulttyq bankpen birlesip infliatsiiany tejeý boiynsha birqatar jedel sharalar qabyldap jatqanyn eske saldy.
«Memleket basshysynyń tapsyrmasy boiynsha 15 aqpanda Úkimet otyrysynda baǵanyń ósýin tejeý úshin 2022-2024 jyldarǵa arnalǵan infliatsiia deńgeiin baqylaý jáne tómendetý boiynsha sharalar kesheni qabyldandy.
Búginde azyq-túlik ónimderiniń baǵasyn turaqty ustap turý úshin Úkimet forvardtyq sharttar jasasý jónindegi sharalardy, shekti jol beriletin bólshek saýda baǵalaryn belgileý quraldaryn jáne bólshek saýda ústemesi jónindegi talaptardyń saqtalýyn baqylaýdy, azyq-túlik taýarlaryna baǵa belgileýdiń búkil tizbegi boiynsha shemalardy tergep-tekserýdi keńinen qoldanady.
Jergilikti atqarýshy organdar profilaktikalyq baqylaý sheńberinde «úi janyndaǵy dúkenderde» 15% ústemaqyny arttyrýǵa jol bermeý boiynsha jumys júrgizýde.
Budan basqa, «ainalym shemasyn» qarjylandyrý jáne turaqtandyrý qorlaryn qalyptastyrý 140 mlrd teńgege deiin ulǵaityldy. Áleýmettik mańyzy bar azyq-túlik taýarlaryn ótkizýshiler úshin jaldaý aqysyn tómendetý máselesi pysyqtalýda», - dedi Eraly Toǵjanov.
Aitýynsha, osy atalǵan jyldyń birinshi toqsanynda azyq-túlik ónimderiniń baǵa indeksin 10% deńgeiinde ustap turýǵa múmkindik bergen.
