Quqyq qorǵaýshy Aiman Omarova «Halyq úni» áleýmettik jobasynyń bastalýyna orai túsinik berdi, dep habarlaidy QazAqparat.
«Qazirgi «Halyq úni» jobamyz Prezident tujyrymdamasyn negizge alyp otyr. Osy joba aiasynda el halqy tiisti máselelerdi jetkizip, ońtaily tájiribesimen de bólise alady. Munyń barlyǵy «Halyq únine qulaq asatyn memleket» tujyrymdamasy laiyqty deńgeide iske asýy úshin qajet bolyp tur», - dedi A. Omarova Antikor alańyndaǵy onlain baspasóz máslihatynda.
«Halyq úni» jobasy barysynda alǵa negizgi alty mindet qoiylyp otyr. Olar:
1. Bilik pen buqaranyń arasyndaǵy bailanysty nyǵaitý;
2. Memlekettik qyzmetterdi, áleýmettik tólemderdi alý sharttaryn turǵyndarǵa keńinen túsindirý;
3. Áleýmettiń ál-aýqatyn arttyrý maqsatynda júzege asyp jatqan memlekettik saiasatty jan-jaqty túsindirý, memlekettik baǵdarlamalarǵa qatysý belsendiligin arttyrý;
4. Shalǵai aimaqtardaǵy turǵyndardy aqparattandyrý salasyn jetildirý;
5. Halyq arasynda túrli áleýmettik máselelerdi taldap-tarazylap, monitoring jasaý;
6. Memlekettik organdardyń jumysynyń durystyǵyn qamtamasyz etý arqyly halyqpen udaiy keri bailanys ornatý.
«Joba aiasynda Abai aýdanyna saparlaǵan kezde turǵyndar tarapynan túrli máseleler kóterildi. Bul jobaǵa QR Sybailas jemqorlyqqa qarsy qyzmeti de qatysqany tiimdi bolatynyn túsinip otyrmyz. Osy oraida agenttik ókilderine, «Altyn Qyran», «Human Rights Lawyers» qorlaryna alǵysymdy aitqym keledi. Olar alǵashqy saparymyz barysynda óziniń eleýli úlesin qosyp úlgerdi. Atalǵan aýdanda kitaphana, internet máselesi, mektepterde aǵylshyn tilin oqytý, turǵyndardyń densaýlyǵy problemalary zerdelendi. Bul turǵyda problemalardy eskerip, hattama daiarlap, ony Prezident Ákimshiligine joldadyq», - dedi Aiman Omarova.
Budan buryn habarlanǵandai, qarasha aiynyń basynda Aiman Omarova «Halyq úni» jobasy bastaý alǵan Shyǵys Qazaqstan oblysyndaǵy Abai aýdany halqynyń problemalaryn atady.
Aqparat jáne qoǵamdyq damý ministrliginiń tikelei qoldaýymen QR Prezidentiniń janyndaǵy Ulttyq qoǵamdyq senim keńesiniń múshesi, quqyq qorǵaýshy Aiman Omarovanyń bastamasymen jáne «Altyn Qyran», «Human Rights Lawyers» qorlarymen áriptestikte «Halyq úni» áleýmettik jobasy qolǵa alynǵan.
