Elimizde advokattardyń áleýmettik qaýipsizdigi kerek. Bul týraly Ulttyq qoǵamdyq senim keńesiniń 4-otyrysynda keńes múshesi Aiman Omarova aitty, dep habarlaidy QazAqparat.
«Júsip Balasaǵun aitqandai: «Ádil sóz ashy kórinedi». Keibir sot advokattardy aqiqatty aitqany úshin qysymǵa alatynyna kýá boldym. «Barlyq azamattardyń qyzmettik jaiy men áleýmettik mártebesine qaramastan zań aldynda teń bolýy kerek» degen sóz árbir qazaqstandyqtyń sanasynda sairap turýy tiis. Sonda ǵana zańnyń ústemdigi óz biiginde qalady. Sottarda prokýrordyń, anda-sanda keletin mediatorlardyń bólmesi bar. Al sot ishinnen shyqpaityn advokattardyń bólmesi de joq», - dedi ol.
Sonymen qatar ol aýylda advokattardyń jetispeitindigin, barynyń jaǵdaiy joq ekendigin basa aitty.
«Advokattardyń áleýmettik qaýipsizdigi. Mundaǵy aitpaǵym, ádildik jolynda basyn báigege tigýge ázir jandar úshin qarapaiym eńbekke jaramsyzdyq paraǵyna qarajat qarastyrylmaidy. Tabys pen zeinetaqy jarnalaryna 10 paiyz mólsherinde qosarlanǵan salyq salynady. Qyzyǵy sol, quqyq qorǵaý, sot organdary úshin tegin júzege asyrylatyn zań kómegi aqparattyq júiesine advokattar aiyna 6 myń teńgeniń ústinde qarajat jumsaýy kerek. Nege olai?», - dedi Aiman Omarova.
Tanymal advokat halyqtyń quqyqtyq saýattylyǵyn arttyrý baǵytynda atqarylyp jatqan jumystarǵa da toqtalyp ótti.
«Zań adam paidasyna jazylady. Adam zań úshin týmaidy». Qoǵam qairatkeri Álihan Bókeihannyń osynaý óreli oiy jyldar jyljyǵan saiyn qundylyǵyn arttyryp keledi. Rasynda ádil zań qoǵam damýynyń irgetasy. Mundaǵy basty másele qarasha halyqtyń quqyqtyq saýattylyǵyn arttyrý bolyp tur. Osy maqsatta QR Sybailas jemqorlyqqa qarsy is-qimyl agenttiginiń tóraǵasy Alik Shpekbaevpen birlesip, «Adal kómek» jobasyna jetekshilik etýdemin. Osy jyldyń aqpan aiynda bastalǵan joba az ýaqytta kópshiliktiń yqylasyna bólendi. Bul turǵyda azamattyq qoǵam memlekettik organdarǵa kómek berýge ázir. Oǵan «Adal kómek» tuǵyrnamasyn qurý arqyly kózimiz jetip otyr. Sońǵy málimet boiynsha 2 mln 200 myńnan astam azamat tikelei efirdi kórip, onyń 26 myńnan astamy joba aiasynda quqyqtyq kómekti tegin aldy», - dedi ol.
Onyń atap ótýinshe, «Adal kómek» arqyly el ishin kezip júrip, túrli túitkildi máselelermen betpe-bet kelgen.
«Airyqsha aitarym, elimizdegi áskeri zeinetkerler ótemaqysyn ala almai júr. Sol sekildi múmkindigi shekteýli tulǵalardyń da taǵdyry alańdatarlyq. Áleýmettiń áleýetin kózben kórý nátijesinde «Halyq úni» jańa jobasynyń ideiasy týyndady. Qazirgi ýaqytta jańa jobany Aqparat jáne qoǵamdyq damý ministri Aida Balaevamen, «Altyn qyran» qorynyń tóraǵasy Islambek Saljanovpen seriktesip júzege asyrmaqpyz», - dedi Aiman Omarova.
