Elimizdegi joǵary oqý oryndary oqytýshylarynyń jalaqysy kóteriledi. Bul jaiynda QR Bilim jáne ǵylym ministri Ashat Aimaǵambetov Facebook paraqshasynda jazdy, dep habarlaidy "Ult aqparat".
«Memleket basshysy bilim sapasyn arttyrý jáne pedagogtardy qoldaý jóninde tapsyrma berdi. Osy tapsyrma aiasynda ministrlik memlekettik JOO rektorlaryna JOO oqytýshylarynyń eńbekaqysyn 2020 jyldyń 10 qańtaryna deiin 30-dan 50 paiyzǵa deiin arttyrý mindetin júktedi. Bul sheshimniń naqty negizderi bar. Biz joǵary oqý oryndarynyń biýdjetine taldaý júrgizdik. Ol eńbekaqy tóleý qoryn ulǵaitý úshin rezervtiń bar ekendigin kórsetti», - dep jazdy ministr.
Onyń atap ótýinshe, búginde birqatar joǵary oqý oryndarynyń oqytýshylary 60-70 myń teńge kóleminde jalaqy alady. Mundai saiasatpen sapany talap etý múmkin emes.
«EUÝ, Kaspii ýniversiteti men Taraz pedagogikalyq ýniversiteti siiaqty joǵary oqý oryndary jalaqyny kóterýdi qazirdiń ózinde bastap ketti. Qalǵan memlekettik JOO meniń tapsyrmamdy mindetti túrde oryndaýy tiis. Sonymen qatar, rektorlardyń aldyna bizdiń JOO-da jumys isteitin akademikterdi arnaiy qosymsha aqy belgileý arqyly qoldaý mindeti qoiyldy. Joǵary oqý oryndarynda akademikter kóp emes, sondyqtan biz ózimizdiń ǵylymi elitamyzdy qoldaýǵa mindettimiz. Bul sharalar memlekettik biýdjetten qosymsha qarajat pen ózge de kúsh-jigerdi qajet etpeitinin erekshe atap ótkim keledi. Barlyǵy qolda bar múmkindikter aiasynda jasalady. Jas ǵalymdardy qoldaý tetikteri de bolashaqta qarastyrylady», - dedi Ashat Aimaǵambetov.
