Bilim jáne ǵylym ministrligi ýniversitetterden eshqandai qujattardy talap etpeidi. Ministrlik apparatynyń otyrysynda Ashat Aimaǵambetov osylai aitty, dep habarlaidy QazAqparat.
«Ártúrli reformalar júzege asyrylyp jatyr. Olar kerek. Alaida sonyń ishinde eń basty máseleniń biri – pedagogtarǵa kedergi jasaityn esep, jalaqy jáne derbestik máselesi. Biz mektepter boiynsha arnaiy buiryqtar qabyldap, toltyratyn naqty tizimdi bekittik. Mekteptegi másele edáýir rettelip qaldy. Kezinde elektrondy kúndelikti engizgen kezde de qanshama suraq týyndaǵan. Biraq tsifrlandyrý baǵytynda biz alǵa jyljydyq», - dedi Ashat Aimaǵambetov ministrliktiń apparattyq otyrysynda.
Ashat Aimaǵambetovtyń aitýynsha, joǵary oqý oryndarynyń pedagogtaryna qatysty qaǵazbastylyq problemasyn sheshý kerek.
«Qazirgi ýaqytta biz akademiialyq jáne basqarýshy quzyretterdiń bárin ýniversitetterge berip jatyrmyz. Sonyń sheńberinde ministrlik rettep otyrǵan ártúrli qujattyń bárin alyp tastadyq. 2 qyrkúiek kúni buiryqqa qol qoiyp, ony Ádilet ministrligine tirkedik. Endi osy buiryqtyń sheńberinde jumys isteý kerek. Bilim jáne ǵylym ministrligi ýniversitetterden eshqandai qujattardy talap etpeidi», - dedi ol.
Ministr JOO pedagogtary qajetsiz jumystardyń bárinen bosap, óz mindetimen ainalysýy kerektigin málim etti.
«Qazir miǵa syimaityn esep túrleri bar. Moiyndaý kerek. Kásipti aiqyndaý jýrnaly, jumysqa ornalasqany týraly anyqtama talap etiledi. JOO-lardyń bári demeimin, biraq birazy áli kúnge deiin osy anyqtamany talap etip júr. Onyń ne keregi bar? Bilim jáne ǵylym ministrligine ol qujat múlde kerek emes. Jumysqa ornalasý kórsetkishin biz basqa memlekettik organdardyń elektrondy bazasynan ala salamyz. Málimetter jetedi. Tipti pedagogtarǵa oiǵa syimaityn talapty qoiatyndar bar. Ásirese jazda keibir JOO-lardaǵy pedagogtardyń jumysy qanshama abitýrientti oqý ornyna tarta alatynyna bailanysty baǵalanady. Bul tipti nonsens. Shyn máninde pedagog óz isimen ainalysýy kerek», - dedi ol.
