Mektep muǵalimderi arasynda ótkiziletin «Úzdik pedagog» konkýrsyna ózgerister engiziledi. Bul týraly QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
Aita keteiik, buǵan deiin ministrlik «JOO-nyń úzdik oqytýshysy» baiqaýynyń erejesine birqatar ózgerister engiziletinin jariialaǵan bolatyn.
«Bul jobany taǵy bir apta talqylaimyz. Odan keiin qazan aiynyń sońyna deiin buiryq qabyldaýymyz kerek. Biyl bolatyn «JOO-nyń úzdik oqytýshysy» konkýrsyn atalǵan buiryq aiasynda ótkizemiz. Sondyqtan ózderińizde usynys bolsa, berýge múmkindik bar. Bul - óte mańyzdy baiqaý. Bizge keregi – ashyqtyq pen ádildikti qamtamasyz etý. Tsifrlandyrý máselesin sheshýimiz kerek. Ádistemelik turǵydan da jańartýymyz qajet. Kórsetkishter boiynsha biraz ózgeris bolady. Sondyqtan bul ózgeristerdi qabyldap, odan keiin áriptesterimizge jetkizýimiz qajet. Eń bastysy - osy úlken konkýrsymyzdy ádil ári ashyq ótkizýge tiispiz. Óitkeni ártúrli alyp-qashpa sózder bar. Ashyq bolsa senim de qalyptasady», - dedi Ashat Aimaǵambetov ministrliktiń apparat jiynynda.
Sonymen qatar, ministr mektep muǵalimderine arnalǵan «Úzdik pedagog» konkýrsyna da ózgerister engiziletinin aitty.
«Mektep deńgeiinde ótetin baiqaý boiynsha da osyndai ózgeristerdi iske asyratyn bolamyz. Sondyqtan komitet tóraǵasyna osyny tapsyramyn. Tsifrlandyrý, ashyq ótýi, onyń ádistemesiniń bolýy máselesi boiynsha jumys júrgizý kerek», - dedi Ashat Aimaǵambetov.
