Shaǵyn jinaqty mektepterdiń muǵalimderine jalaqy tóleý tetigi ózgertiledi. Bul týraly QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Memleket basshysy orta bilim boiynsha qashyqtan oqytý platformalarynyń múmkindigin arttyrý tapsyrmasyn bergenin bilesizder. Birkelkilendirý, ortaq talaptar qoiý boiynsha jumysty bastap kettik. Ary qarai bul jumysty jalǵastyryp, tiisti deńgeide oryndaityn bolamyz. Ustazdardyń jalaqysy boiynsha qarjy biýdjette qarastyryldy jáne 1 qańtardan bastap beriledi dep otyrmyz. Osy jyldyń qyrkúiek aiynyń ózinde ustazdardyń dápter tekserý boiynsha ústemeaqysy 2 ese kóbeidi. Sonymen qatar ustazdardyń synyp jetekshiligi úshin alatyn ústemeaqysy da eki ese artyp otyr»,- dedi ministr Úkimet úiinde ótken baspasóz máslihatynda.
Onyń aitýynsha, biyl magistratýra bitirgen ustazdarǵa magistrlik deńgeiine sáikes aiyna qosymsha 27 myń teńgeden alatyn bolady.
«Memleket basshysy aýyl, qala mektepterin damytý, ásirese jalpy bilim berýdi damytý boiynsha tapsyrma berdi. Bul tapsyrmany oryndaý úshin tiisti jumystar júrgiziletin bolady. Eń aldymen shaǵyn jinaqty mektepterge qatysty. Olarda birneshe problema bar. Birinshisi - ustazdardyń jetispeýshiligi, ekinshisi - materialdyq-tehnikalyq bazasy, bilim deńgeii. Sondyqtan osy turǵyda jumys júrgizemiz. Eńbekaqy tóleý tetigin ózgertemiz. Utqyr muǵalim, internat salý, ádistemelik kómek, oqytý jumystary, jalpy materialdyq-tehnikalyq bazany jańartý boiynsha is-sharalar qabyldanady», - dedi ol.
