Ǵylymi dissertatsiia qorǵaý kezindegi jariialanymdarǵa qoiylatyn talaptar qaita qaralyp jatyr. Bul týraly Bilim jáne ǵylym ministri Ashat Aimaǵambetov «Egemen Qazaqstan» gazetine bergen suhbatynda aitty, dep habarlaidy "Ult aqparat".
«Qazir Memlekettik ǵylymi-tehnikalyq saraptama ulttyq ortalyǵynyń bazasynda bitirý jumystarynyń (diplomdyq jumystardyń, magistrlik jáne doktorlyq dissertatsiialardyń) Biryńǵai repozitoriii qurylýda. Zertteýler men akademiialyq mádeniet sapasyn jaqsartý úshin ǵylymi jáne jazbasha jumystardy «Internet» júiesi men halyqaralyq derekter qory arqyly tekseristen ótkizý mindetteldi. Dissertatsiia qorǵaý kezindegi jariialanymdarǵa qoiylatyn talaptar da qaita qaralyp jatyr. Búginde doktorant qorǵaýǵa shyǵý úshin 7 maqala jariialaýy tiis, degenmen onyń mazmunyna erekshe bir talap qoiylmaidy. Bul kórsetkishke qol jetkizý úshin sapasy kúmán týdyratyn jýrnaldarda jariialanady. Bizdiń ǵalymdardyń maqalalary halyqaralyq bazaǵa enbeitin jýrnaldarda jariialanǵan jaǵdailar jiilep ketti. Álbette, bul tájiribeni ózgertý kerek. Qaǵida qarapaiym – «bedelsiz» jýrnaldardaǵy birneshe jariialanymnyń ornyna joǵary sapaly jýrnaldaǵy bir maqala bolǵany durys. Bul rette gýmanitarlyq jáne áleýmettik mamandyqtar boiynsha maqalalarǵa qoiylatyn talaptar onyń ereksheligine qarai saralanady», - dedi ministr.
Onyń atap ótýinshe, biyldan bastap ǵylymi qyzmettiń negizgi nátijelerin jariialaý úshin Bilim jáne ǵylym salasyndaǵy sapany qamtamasyz etý jónindegi komitet usynyp otyrǵan ǵylymi basylymdar tizbesine kiretin jýrnaldarǵa qoiylatyn talaptar da ózgertiledi. Sebebi qazirgi ýaqytta bul tizimge kontenttiń joǵary sapasyn árdaiym qamtamasyz etpeitin, birshama formaldy ólshemder boiynsha iriktep alynǵan 177 basylym kiredi.
«Osyǵan bailanysty qoldanystaǵy kriteriilerdi halyqaralyq talaptarǵa beiimdeý boiynsha jumys bastaldy. Máselen, 2 ret syrttai retsenziialaý, naqty redaktsiialaý saiasaty, jýrnaldyń taqyryptyq baǵytyna qabyldanatyn maqalalardyń sáikestigi, sheteldik mamandardyń retsenziialary, bireýden alyp paidalanýdy tekserý, barlyq jariialanym protsesiniń ashyqtyǵy, myqty redaktsiia alqasy jáne t.s.s. Kórsetilgen tizbege kiretin barlyq otandyq jýrnaldarǵa qoiylatyn osy talaptar 2 jyl ishinde birtindep engiziledi. Basylymdardyń sany birshama qysqarady dep oilaimyn, sapaly kontent úshin básekelestik artady jáne halyqaralyq deńgeidegi ǵylymi basylymdardy shyǵarýdyń kásibi akademiialyq mádenietin qalyptastyrýǵa yqpal etedi. Sondai-aq ǵylymi jýrnaldarǵa qarjylai qoldaý kórsetý úshin konkýrs jariialap, Scopus jáne Web of Science halyqaralyq bazasyna kiretin otandyq jýrnaldarǵa demeý berý josparlanyp otyr», - dedi Ashat Aimaǵambetov.
