Bilim jáne ǵylym ministri Ashat Aimaǵambetov Almaty oblysynyń Taldyqorǵan qalasyndaǵy №4 orta mektepte oqýshynyń ustazǵa daýys kóterip, balaǵat sóz aitýyna qatysty videoǵa pikir bildirdi, dep habarlaidy "Ult aqparat".
«Otandastarym siiaqty men de Taldyqorǵandaǵy №4 orta mektepte túsirilgen muǵalim men oqýshy arasyndaǵy jaǵdai týraly videony kórdim. Árine, oqýshynyń ustazǵa daýys kóterip sóilegeni kóńilimdi túsirdi.
Qai zamanda bolmasyn azamattarymyz úlkenderge, ásirese ustazdarǵa qurmetpen qaraityn, olardy syilaityn. Úlkendi syilaý, otbasy qundylyǵy, adaldyq, inabattylyq, eńbeksúigishtik, bilimge qushtarlyq, zańǵa baǵyný jáne otansúigishtik bolashaq urpaqty tárbieleýdiń negizi bolýy kerek.
Búgin men №4 orta mekteptiń muǵalimimen telefon arqyly sóilestim. Ol bilim salasynda 11 jyl boiy qyzmet etip keledi. Áriptesime qoldaý sózder aityp, qajyrly eńbegi, shydamdylyǵy men adaldyǵy úshin alǵys bildirdim», - dep jazdy ministr Telegram-da.
Aimaǵambetovtiń jazýynsha, oqýshy men kámeletke tolmaǵan balalar úshin jaýapty ata-anaǵa qatysty zańnamaǵa sáikes shara qabyldanady.
«Ákimshilik hattama toltyryldy. Sondai-aq balanyń ata-anasyna qatysty ákimshilik is qozǵaldy. Endi sheshimdi Almaty oblysynyń kámeletke tolmaǵandardyń isteri jónindegi mamandandyrylǵan aýdanaralyq soty qabyldaidy.
Óz tarapymyzdan pedagogterge degen mundai qarym-qatynasty, kózqarasty joiyp, jolyn kesý úshin qatań sharalar qabyldaitynymyzdy eskertemin. Qoǵamda muǵalimniń mártebesi joǵary bolýy kerek.
Buǵan deiin oqýshyǵa psihologiialyq kómek kórsetý jáne ony esepke qoiý týraly másele qaralatynyn habarlaǵan bolatynbyz.
Mundai jaǵdaida ata-ana men mekteptiń birlese júrgizetin tárbie jumysy mańyzdy ról atqarady. Balalardy úlkenderge, ásirese qoǵamymyzdyń damýyna úles qosyp júrgen ustazdarǵa qurmetpen qaraý siiaqty qasietterge baýlýǵa shaqyramyn», - dedi QR Bilim jáne ǵylym ministri.
