Oqý-aǵartý ministri Ashat Aimaǵambetov depýtat Iýliia Kýchinskaianyń muǵalimderge demalys jáne saýyqtyrý tólemderi keshiktirilip jatyr degen synǵa jaýap berdi, dep habarlaidy Sputnik Qazaqstan.
Ministrdiń aitýynsha, zań memlekettik organdar arasyndaǵy fýnktsiialardy naqty ajyratady. Muǵalimderge beriletin tólemder - jergilikti atqarýshy organdardyń tikelei quzyreti.
"Muǵalimderge, balabaqsha tárbieshilerine barlyq tólemdi oqý-aǵartý ministrligi jasamaidy. Sondyqtan respýblikalyq ortalyq organnyń muǵalimderge tikelei qaryzy bar dep aitý múldem durys emes. Quzirettiliktiń bólinýin bilip, mundai sóz qandai maqsatpen aitylatynyn bilmeimin. Barlyǵy burynnan barlyq qujatta bekitilgen", - dedi vedomstvo basshysy.
Aimaǵambetov vedomstvo baqylaý fýnktsiialaryn atqaratynyn atap ótti. Jaǵdaidy monitoringileý kezinde ministrlik birqatar óńirde tólemder keshiktirilgenin anyqtady.
"Keshiktirý barlyq aimaqta bolǵan joq. Keibireýinde tólemge qatysty problemalar boldy. Eger jaǵdai barlyq jerde bolsa, onda ortalyq organnyń problemasy dep aitýǵa bolady. Biz jergilikti organdardyń somasyn anyqtadyq. Olarda muǵalimderge tólem jasaýǵa aqsha bar, biraq biýdjettegi túzetýlerge bailanysty kidiris bolǵan. Qazir tólemder júrip jatyr, keshegi kúnge 8 milliard teńge qaldy. Biz jaǵdaidy baqylap otyrmyz", - dep túsindirdi Ashat Aimaǵambetov.
Eske salsaq, keshe májilis depýtaty Iýliia Kýchinskaia qazaqstandyq muǵalimderdiń bir bóligi mamyr aiynyń jalaqysyn ala almai júr degen bolatyn. Al eńbek demalysy men saýyqtyrý aqysy boiynsha bereshek 30 milliard teńgege jetken.
Onyń aitýynsha, sońǵy kúnderi depýtattardyń atyna mektep muǵalimderinen aryz-shaǵym kóp túsedi. Memleket jalaqy, eńbek demalysy jáne saýyqtyrý aqysy boiynsha ustazdarǵa bereshek bolyp qalǵan.
