QR Bilim jáne ǵylym ministri Ashat Aimaǵambetov «Kitapqa qushtar mektep» jobasyn iske asyrýdaǵy kemshilikterdi atady, dep habarlaidy QazAqparat.
«Kitap oqý mádenietin qalyptasyrý, jalpy oqý saýattylyǵyn arttyrý - biz úshin úlken mindet. Osy baǵytta «Kitapqa qushtar mektep» jobasyn iske asyryp jatyrmyz. Árine, joqqa shyǵarýǵa bolmaidy, jaqsy ózgerister bar. Qazirgi ýaqytta kitaphanalardyń balalarǵa qajetti ádebiettermen tolyqtyrylýy durys. 400-den astam ártúrli kovorking ortalyqtarynyń ashylýy, kitaphanashylardyń jańa formatta jumys istei bastaýy, oqyrmandardyń kóbeiýi qýantady. Biraq, áli de sheshilmei jatqan másele barshylyq. Oǵan da nazarlaryńyzdy aýdartamyn. Onyń ishinde barlyq óńirde birdei joǵary deńgeide osy joba iske asyp jatqan joq. Ásirese, elordamyzda, Aqmola oblysynda, basqa da óńirlerde bul joba óte tómen deńgeide iske asyrylyp jatyr», - dedi Ashat Aimaǵambetov búgin Bilim jáne ǵylym ministrliginiń apparat jinalysynda.
Sonyqtan ministr oblystardyń bilim basqarmalary, mektep direktorlary «Kitapqa qushtar mektep» jobasyn tiisti deńgeide uiymdastyrýy qajettigin basa aitty.
«Kún saiyn 20 minýt kitap oqý máselesin de biyl arnaiy engizgenbiz. Kovorking formatynda jumys uiymdastyrý, kitaphanashylardyń jumysyn jańa formatta uiymdastyrý, basqa da baǵytta jumys júrgizilýi kerek. Biraq, búginde osy máselelerge tiisti deńgeide kóńil bólinbei jatyr. Anaý kúni bir mektepke baryp, kitaphanasyn qaradym. Kitaphanaǵa kirip kelgende balalarǵa arnalǵan kitaptar turýy kerek. Biraq, onyń ornyna balalarǵa qyzyqty emes týyndylar qoiǵan. Sonda basty baǵyttyń, mindettiń ózin eshkim túsinbegeni ǵoi. Satyp alynǵan kitaptardyń ózin qarasaq, qajet emes. Múmkin qajet te shyǵar. Biraq, osyndai kitaptardyń qajet emes kólemin satyp alǵan. Óte kúrdeli. Áiteýir kitap satyp alý kerek dep, oiyna kelgen kitapty satyp alýdyń qajeti joq. Tiisti tizim, mektep baǵdarlamasy bar. Sol baǵdarlamaǵa sai satyp alý kerek», - dedi ol.
Osy rette Ashat Aimaǵambetov barlyq óńirlerge 2 apta ishinde mektep kitaphanalaryndaǵy ádebi kitaptarǵa taldama júrgizip, esep berýdi tapsyrdy.
«Sol eseptiń nátijesi boiynsha tiisti shara qabyldaimyz. Qajet bolsa, oryndarynan bosatý kerek. Kitap oqyý mádenietin, saýattylyǵyn arttyramyz dep jatsaq, keibir áriptesterimiz muny túsinbese, onda olar ary qarai jumysyn jalǵastyrmaýy kerek. Bul biz, Memleket basshysy aitpai-aq ár adamnyń, ár qyzmetshiniń kúndelikti jumysy», - dedi ministr.
