© Photo : STsK
Bilim jáne ǵylym ministri Ashat Aimaǵambetov tórt oblysta muǵalim tapshylyǵy máselesi qalai sheshiletinin aitty, dep habarlaidy Sputnik Qazaqstan.
Ministrdiń aitýynsha, qazir Atyraý, Mańǵystaý, Túrkistan jáne Almaty oblystarynda muǵalim tapshylyǵy qatty seziledi. Kadr jetispeýshiligin sheshý úshin ministrlik arnaiy baǵdarlama qabyldap jatyr. Oǵan tiisti qarjy bólinýde.
"Birinshiden, muǵalim tapshylyǵy bar óńirlerge barǵan áriptesterimizdiń jalaqysy eki ese kóp bolady. Biraq olarǵa KRI retinde kórsetkishter qoiylady. Ekinshiden, olarǵa jumys istegen ýaqytta baspana beriledi, úidiń kommýnaldyq shyǵyndaryn memleket óteidi. Osylaisha eń úlken tapshylyq bar óńirlerdegi máseleni sheship jatyrmyz", - dedi Aimaǵambetov májilis kýlýarynda.
Aitýynsha, qarajat respýblkalyq transfertter esebinen baǵyttalady.
"Iaǵni, bul maqsatty transfertter. Aqsha jergilikti biýdjetke jiberiledi. Keiin ol arnaiy konkýrstan ótip, óńirge sabaq berýge kelgen muǵalimderge tólenedi", - dep túsindirdi ministr.
Aimaǵambetovtiń aitýynsha, muǵalimder tapshylyǵy oqýshylar sanynyń ósýi sebep bolyp otyr.
"On jyl ishinde mektepte oqityn balalar sany bir millionǵa jýyq artty. Ol degenimiz muǵalimder sany da ósip jatyr degendi bildiredi. Endi 2025 jylǵa deiin bizge taǵy 100 myń muǵalim qajet bolady. Bizge jańa mektepter qajet, al jańa mektepterge jańa muǵalimder kerek. Bir mektep ashylǵanda ortasha eseppen 150-200 muǵalim qajet bolady. Soǵan bailanysty osyndai másele týyndap jatyr", - dedi ol.
Ministr kadr tapshylyǵy máselesi buǵan deiin de bolǵanyn atap ótti. Qazir ministrlik problemany júieli túrde sheshýge kirisken.
