Muǵalimde tek qana bir synyp emes, kem degende 10-15 synyp bolady. Bul týraly Ortalyq kommýnikatsiialar ortalyǵynda «Tótenshe jaǵdai kezinde qashyqtan oqytýdyń jańa formattary» taqyrybynda ótken onlain brifingte aityldy, dep habarlaidy QazAqparat.
«Ustazdar belsendi jumys atqarýda. Óte jaqsy qabyldap, bizdi qoldap jatyr. Ustazdarǵa qazir óte qiyn. Men áleýmettik jelilerde jáne basqa da áriptesterimmen sóilesken kezde muǵalimderdiń jumysy azaiǵany týraly pikirler estimin. Bul pikirmen tolyq kelispeimiz. Dástúrli rejimde muǵalimder synypqa kelip, 25-30 balaǵa sabaq júrgizip, kelesi synypqa kóship otyrsa, bul jerde jaǵdai – basqasha. Úide otyryp jumys júrgizgenniń ózinde 25-30 balanyń árqaisysymen jeke-jeke jumys júrgizýi kerek bolady. Tańnyń atysy men kúnniń batysyna deiin, túnniń bir ýaǵyna deiin ár balamen jumys júrgizip otyr. Ol óte ońai emes. Muǵalimde tek qana bir synyp emes, kem degende 10-15 synyp bolady. Jumys istep jatqan áriptesterime úlken alǵys aitqym keledi» - deidi QR Bilim jáne ǵylym ministri Ashat Aimaǵambetov.
Onyń aitýynsha, búgin ata-analar úshin de óte qiyn boldy.
«Biz áleýmettik jelilerde jáne buqaralyq aqparat arqyly aitylyp jatqan syn-pikirlerdi estip, naqty jumystar atqaryp jatyrmyz. Ata-analarǵa da úlken salmaq túsip jatyr, óitkeni dástúrli oqý rejiminde úi jumysyn jasaý degenniń ózi úlken júkteme edi. Endi qazir balalar kúni boiy úide, dalaǵa shyǵý múmkindigi joq. Kúndiz úi jumysyn ǵana emes, sabaq oqýdy uiymdastyrǵan kezde ata-analarǵa emotsionaldyq turǵyda ońai emes. Árine, biz istep jatqan jumystar ózimizdiń balalarymyz, olardyń jarqyn bolashaǵy úshin. Sondyqtan ustazdarǵa kómek berip, balalar úshin ári qarai jumysymyzdy birge jasaimyz dep oilaimyn», - dedi ministr.
