Memleket basshysynyń bilim jáne ǵylym salasyndaǵy tapsyrmalary oryndalyp jatyr. Bul týraly QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Memleket basshysy Qasym-Jomart Toqaev bilim salasyna, ǵylym salasyn damytýǵa óte úlken kóńil bólýde. Prezident ótkizgen jinalystarynda, tapsyrmalarynda bilim jáne ǵylym salasyn aldyńǵy qatarǵa qoiyp otyr. Joǵary oqý ornyna qatysty biraz tapsyrma boldy. Diplom jasaýdy bizneske ainaldyryp, ony beretindermen kúres júrgizip jatyrmyz. Birneshe ýniversitet jabyldy. Qazir indetke bailanysty tekseris júrgizý máselesinde qiyndyqtar bar», - dedi ministr Ortalyq kommýnikatsiialar qyzmetindegi baspasóz máslihatynda BAQ ókilderiniń saýalyna orai.
Sonymen qatar ol mysal retinde elimizdiń ońtústiginde ornalasqan Óńirlik ýniversitetke qatysty máselege toqtaldy.
«Sol ýniversitettiń ózinde 35 myń bala boldy. Sol 35 myń bala oqityn ýniversitetti japtyq. Onda kóbine sabaq ótkizilmegen, tiisti deńgeii joq. Osyndai múshkil jaǵdaida boldy. Munan ózge de birneshe ýniversitetti japqan edik. Qazirdiń ózinde sotta bizdiń biraz qujattarymyz jatyr. Óitkeni, bul jumysty zańnama negizinde iske asyrýymyz qajet. Jumys ary jalǵasady, tapsyrmany oryndaý ústindemiz», - dedi Ashat Aimaǵambetov.
