Bilim jáne ǵylym ministri Ashat Aimaǵambetov kitaphanalardy ádebi kitaptarmen tolyqtyrý máselesine qatysty tapsyrma berdi, dep habarlaidy QazAqparat.
«Bul – óte mańyzdy taqyryp. Munyń aldynda da osy tapsyrmany bergen bolatynbyz (mektep kitaphanalaryn ádebi kitaptarmen tolyqtyrý). Oqý saýattylyǵy boiynsha halyqaralyq zertteýlerdi qaraityn bolsaq, biraz problema bar. Ony sheshý úshin árine biz kórkem ádebietti balalarǵa oqytý boiynsha úlken jumys atqarýymyz kerek. Biraq qazir kitaphanalarymyz qandai jaǵdaida? Jalpy kitaphana qory qandai? Kitaphanashylardyń jaǵdaiy qandai? Osy suraqtarǵa jaýap berer bolsaq, árine búgingi tańda birqatar másele bar. Sondyqtan osy sala úlken ózgeristerdi qajet etedi», - dedi Ashat Aimaǵambetov Bilim jáne ǵylym ministrliginiń apparattyq otyrysynda.
Ministr bul baǵytta jol kartasy bekitiletinin jetkizdi.
«Búgingi kúni qazaq tilinde oqýshylardyń 70 paiyzǵa jýyǵy bilim alýda. Al oqýshylar kitaphanaǵa kelgende birinshiden qazaq ádebieti boiynsha tiisti kitaptar bolýy kerek. Ol qoljetimdi me? Osy máseleni sheshýimiz kerek. Ekinshiden qazaq ádebieti birinshi bolsa, odan keiin dúniejúzilik ádebiet qoljetimji bolýy tiis. Eń birinshi kezekte qazaq tilinde! Mysaly Aizek Azimov, Rei Bredberi sekildi álemdik klassikterdiń qazaq tiline aýdarylǵan kitaptary bar ma? Olar bar bolǵanymen kitaptardy kitaphanalar men mektepterge alyp jatyrmyz ba degen suraqqa berer bolsaq, bul sharýa biraz eńbekti qajet etedi. Ol balalardyń kókjiegin keńeitýimiz kerek. Balalar bir jaǵynan qazaq, ekinshi jaǵynan dúniejúzilik ádebietten sýsyndap, ózderi jetilýi tiis. Sol arqyly oqý saýattylyǵyn arttyra alamyz», - dedi ol.
