Bilim jáne ǵylym ministri Ashat Aimaǵambetov Aqtóbege jumys saparymen keldi, dep habarlaidy oblys ákiminiń baspasóz qyzmeti.
Ashat Aimaǵambetov eń aldymen jumys saparyn Q.Jubanov atyndaǵy Aqtóbe óńirlik ýniversitetiniń professor-oqytýshylar qaýymymen kezdesýden bastady. Ministr bilim ordasynyń ujymyna «Bolashaq» baǵdarlamasynyń túlegi, gýmanitarlyq ǵylymdar magistri, Nazarbaev ýniversitetiniń doktoranty Laýra Qarabasovany rektor etip taǵaiyndap, ujymmen tanystyrdy.
Sodan keiin ministr Aqtóbe joǵary politehnikalyq kolledjinde bolyp, «Jas maman» jobasynyń jumysymen tanysty. Kolledjde kóptegen jastar aýyl sharýashylyǵy, munai jáne gaz, elektrmen jabdyqtaý baǵytynda bilim alyp júr. Kolledj stýdentteriniń shyǵarmashylyq jumystarymen tanysqan ol memleket tarapynan bilim salasyna jasalyp jatqan qoldaý turǵysyndaǵy jumystarǵa toqtalyp ótti.
Sondai-aq Ashat Aimaǵambetov Batys-2 shaǵyn aýdanynda ornalasqan «Bilim» mektep-gimnaziiasynda boldy. Jeke kásipkerdiń qarjysyna turǵyzylǵan jańa nysannyń ishin aralap kórgen bas ustaz zamanaýi talaptarǵa sai jabdyqtalǵan synyptarǵa óziniń oń baǵasyn berip ótti.
Jumys saparynyń sońynda ministr óńir basshysy aimaqtyń bilim salasynyń qyzmetkerleri, pedagogika qaýymdastyǵymen, mektep direktorlarymen uiymdastyrylǵan kezdesýge qatysyp, QR Prezidentiniń Joldaýynda aitylǵan basymdyqtarǵa toqtaldy.
«Memleket basshysy bilim-ǵylym sapasyn arttyrý baǵytynda aldymyzǵa naqty tapsyrmalar qoiyp otyr. Pedagog mártebesin kóterý, mektep qurylysyn arttyrý, joǵary jáne arnaýly bilim mekemelerin qoldaý boiynsha elimizde kóptegen jumystar atqarylyp jatyr. Aldaǵy ýaqytta Prezident tapsyrmasyn oryndaý boiynsha elimizde myńnan astam mektep salynady. Aqtóbe oblysynda da 20 mekteptiń qurylysy júrgizilip jatyr. Biz oblys ákimimen birge bilim salasyn qoldaý baǵytynda ekijaqty memorandýmǵa qol qoidyq. Sapaly bilim berý men ustazdar qaýymyn qoldaý turǵysynan kelgende Aqtóbe oblysynyń áleýeti óte joǵary. Óńirde jasalǵan jumystar óte kóp, birlesip atqaratyn jumystar óz jalǵasyn tabatyn bolady», - dedi Ashat Aimaǵambetov.
