Foto: Pexels
Almaty qalasynyń Áýezov aýdandyq soty qoǵamdy eleń etkizgen «Aika tizimi» boiynsha qylmystyq isti qarady, dep habarlaidy «Ult aqparat» Kazinform-ǵa silteme jasap.
Aita keteiik, aiyptalýshy retinde M. jáne T. esimdi azamattar sanalǵan bolatyn.
Tergeý organy M.-ny asa iri mólsherde psihotroptyq zatty zańsyz iemdendi, saqtady jáne tasymaldady, sondai-aq 52 epizod boiynsha bir top adamdarmen jeńgetailyq jasady dep (QK-niń 296-babynyń 4-bóligi, 309-babynyń 2-bóligi, 1-tarmaǵy) aiyptady.
Al, T. -ǵa bir top adamdarmen 12 epizod boiynsha jeńgetailyqqa kómektesti degen aiyp taǵyldy (QK-niń 28-babynyń 5-bóligi, 309-baptyń 2-bóligi, 1-t.).
Sot otyrysy jabyq rejimde ótti. Belgili bolǵandai, 2023 jyldyń mamyr aiynda M. asa iri mólsherde mefedrondy (psihotroptyq zatty) satý maqsatynsyz zańsyz satyp alyp, ózimen birge zańsyz tasymaldaǵan. Ustaý kezinde politsiia qyzmetkerleri sottalýshynyń sómkesinen psihotroptyq zat tárkilegen.
Sondai-aq M. 2020-2023 jyldar aralyǵynda materialdyq paida alý maqsatynda T.-men birlesip, intimdik qyzmet kórsetý úshin jeńgetailyq jasaǵan.
M. osy qyzmetter arqyly jeke ózi nemese sybailasy T. arqyly qyzdardan aqsha alyp otyrǵan.
Sottalýshylardyń kinási kýálardyń aiǵaqtarymen, saraptamalyq qorytyndylarmen jáne is boiynsha basqa da materialdarmen dáleldendi.
M. kinásin ishinara moiyndaǵan, T. kinásin moiyndamaǵan. Prokýror M.-ny jalpy qylmys jiyntyǵy boiynsha 4 jylǵa, T.-ǵa 3,5 jylǵa bas bostandyǵynan aiyrý jazasyn taǵaiyndaýdy surady.
Jaza taǵaiyndaý kezinde sot M.-nyń jasaǵan isine ókinetinin, qylmysty ashýǵa belsendi túrde kómekteskenin, jas balasynyń bolýyn jeńildetetin mán-jailar retinde tanydy.
T.-nyń qylmystyq jaýaptylyǵy men jazasyn jeńildetetin jáne aýyrlatatyn mán-jailar anyqtalmady.
Osylaisha, M. QK-niń 296-babynyń 4-bóligi, 309-babynyń 2-bóligi, 1-tarmaǵy boiynsha kináli dep tanylyp, oǵan qylmystar jiyntyǵy boiynsha túpkilikti 6 jyl 6 ai túrinde jaza taǵaiyndaldy.
Al, T. QK-niń 28-babynyń 5-bóligi, 309-baptyń 2-bóligi, 1- tarmaǵy boiynsha kináli dep tanylyp, oǵan 3 jyl 8 ai túrinde jaza taǵaiyndaldy.
Sottyń úkimi zańdy kúshine engen joq.
