«Aika» filmi «Oskar» úmitkerleriniń aqyrǵy tizimine enbei qaldy, dep habarlaidy "Ult aqparat" kinojúldeniń resmi saityna silteme jasap.
«Úzdik sheteldik film» nominatsiiasyndaǵy aqyrǵy tizimge bes film endi. Olar: «Roma» (Meksika, rejisseri - Alfonso Kýaron),«Qyrǵi-qabaq soǵys» (Polsha, Pavel Pavlikovskii), «Urylar» (Japoniia, Hirokadzý Koreeda), «Kapernaým» (Livan, Nadin Labaki) jáne germaniialyq Florian Henkel fon Donnersmark túsirgen «Ainalańa jaltaqtama» filmi.
Jeńimpazdar 24 aqpanynda «Oskar» syilyǵyn tabystaýdyń 91-shi rásiminde anyqtalady. Úzdikterdi marapattaý Los-Andjeles qalasynyń Dolby teatrynda ótedi.
Buǵan deiin «Aika» filminiń «Oskar» kinosyilyǵynyń «Shetel tilindegi úzdik film» kategoriiasyndaǵy toǵyz kartinadan turatyn qysqa tizimge engenin habarlaǵan edik.
«Aika» filminiń siýjeti - Qyrǵyzstannan Máskeýge kelip, onda zańsyz jumys istep júrgen jas emigrant áieldiń oqiǵasy, onyń ishki adami ósýi, analyq sezimi jaily. Basty róldi qazaqstandyq aktrisa Samal Esliamova somdaǵan. Buǵan deiin ol 71-shi Kann kinofestivaliniń úzdik aktrisasy dep tanylǵan edi.
