Foto: primeminister.kz
Premer-Ministr Álihan Smaiylov Senat otyrysynan keiingi BAQ ókilderine arnalǵan brifing barysynda otbasylyq-turmystyq qatynastar salasyndaǵy qylmystar úshin jaýapkershilikti kúsheitý sharalary týraly aitty, - dep habarlaidy "Ult aqparat" primeminister.kz saityna silteme jasap.
Úkimet basshysy atap ótkendei, 2009 jyly elimizde «Turmystyq zorlyq-zombylyq profilaktikasy týraly» Zań qabyldandy. Qazaqstan TMD-da osyndai zań qabyldanǵan alǵashqy el boldy. Keiingi jyldary jaýapkershilikti kúsheitý jaǵyna qarai zańnamaǵa birneshe ret ózgeris engizildi.
«Biyl sońǵy ózgerister qabyldandy. Atap aitqanda, qamaýǵa alý merzimi 5 táýlikten 15 táýlikke deiin, al zań buzýshylyq qaitalanǵan jaǵdaida 25 táýlikke deiin uzartyldy. Sonymen qatar qaitadan tatýlasý múmkindigi alynyp tastaldy jáne turmystyq janjal barysynda densaýlyqqa aýyr nemese ortasha ziian keltirilse, ol adam 3 jyldan 6 jylǵa deiin bas bostandyǵynan aiyrylady», — dedi Álihan Smaiylov.
Sonymen birge ol buryn qabyldanǵan normalar óz nátijesin berip jatqanyn aitty. Sońǵy 4 aida jaýapqa tartylǵan otbasynyń shyrqyn buzýshylardyń sany ósti. Eger osy jyldyń II toqsanynda 7 myń adam jaýapkershilikke tartylsa, III toqsanda olardyń sany 27 myń adamdy qurady.
«Zańnamadaǵy ózgeristerge sáikes, endi jábirlenýshi taraptyń mindetti málimdemesi talap etilmeidi. Kýágerlerdiń aiǵaqtary nemese beinekameralardan alynǵan jazbalar jetkilikti. Kóbinese jábirlenýshi tarap aryz jazbaidy, ne ony qaitaryp alady. Endi bul jaǵdai túbegeili ózgerdi. Biz quqyq qorǵaý organdarynyń statistikasynan oń dinamika kórip otyrmyz», — dedi Premer-Ministr.
Álihan Smaiylovtyń aitýynsha, atalǵan baǵyttaǵy jumystar jalǵasyp jatyr. Qazan aiynyń ortasynda Úkimetke áielderdiń quqyqtary men balalardyń qaýipsizdigin qamtamasyz etý týraly zań jobasy usynyldy. Turmystyq zorlyq-zombylyq úshin jaýapkershilikti kúsheitýge baǵyttalǵan túzetýlerdiń sany 90-nan asyp túsedi. Olardyń basym bóligi qoldaý taýyp, jaqyn arada zań jobasy QR Parlamenti Májilisiniń qaraýyna engizilmek.
«Óz basym áielderge qatysty zorlyq-zombylyqtyń kez kelgen túrine qarsymyn. Men de qyz tárbielep otyrmyn, olardyń elimizde ózderin qaýipsiz sezingenin qalaimyn», — dedi Premer-Ministr.
