Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine memlekettik jastar saiasaty máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy QazAqparat.
«Zań jobasy memlekettik jastar saiasaty salasyn jetildirýge, qoǵamdyq qatynastardy keshendi retteýdiń tiimdi quqyqtyq negizin qalyptastyrýǵa, jumyspen qamtýdy qamtamasyz etýge, jastardyń damýyna qolaily jaǵdai jasaýǵa baǵyttalǵan. Zań jobasymen jumys barysynda depýtattar «jastar» uǵymynyń jas shegin 29-dan 35 jasqa deiin ulǵaitýǵa baǵyttalǵan túzetý engizdi. Bul - jastardyń áleýmettik belsendiligin arttyrýǵa yqpal etedi. Jergilikti atqarýshy organdarǵa jastarǵa jeńildikpen jalǵa beriletin turǵyn úi tapsyrý jónindegi baǵdarlamany ázirleý jáne iske asyrý boiynsha jańa quzyret berýge baǵyttalǵan túzetýler engizdi», - dedi depýtat Jámilá Nurmanbetova.
Budan basqa, Memleket basshysynyń 2022 jylǵy 1 qyrkúiektegi Qazaqstan halqyna arnaǵan Joldaýyn iske asyrý turǵysynda depýtattar zań jobasy aiasynda áleýmettik blokqa qatysty tiisti túzetýler engizdi.
Osy oraida bala kútimi boiynsha tólemderdi taǵaiyndaý kezeńiniń uzaqtyǵyn 1,5 jasqa deiin ulǵaitý, eń tómen bazalyq zeinetaqy mólsherin eń tómen kúnkóris deńgeiinen – 70% deiin, eń joǵary bazalyq zeinetaqy mólsherin 120% deiin dáiekti túrde jetkizý, áielder úshin zeinetkerlikke shyǵý jasyn 2028 jylǵa deiin 61 jas deńgeiinde bekitý, sondai-aq jasyna bailanysty zeinetaqy tólemderin esepteý úshin tabys shegin 46 eselengen ailyq eseptik kórsetkishten 55 eselengen deńgeige deiin ulǵaitý eskerilgen.
«Zań jobasy sheńberinde qaralatyn máseleler aiasynyń keńeiýin eskere otyryp, depýtattar zań jobasynyń taqyrybyn «Qazaqstan Respýblikasynyń keibir zańnamalyq aktilerine memlekettik jastar saiasaty jáne áleýmettik qamsyzdandyrý máseleleri boiynsha ózgerister men tolyqtyrýlar engizý týraly» dep ózgertý jóninde usynys engizdi», - dep naqtylady Nurmanbetova.
Aita keteiik, biyl qyrkúiek aiyndaǵy Joldaýynda Memleket basshysy Qasym-Jomart Toqaev áielderdiń zeinet jasyn 2028 jylǵa deiin 61 jas deńgeiinde qaldyrý týraly tapsyrma berdi.
